Launglon Peng, Ni 2 Chung Kahdohnak Ah SAC Ralkap 10 An Thi, PDF 3 An Nunnak A Liam
The Chinland Post | 2023 August 4 — Taninthary ramṭhen, Launglon peng, Nakandaw khuate, Yatkhan tlang pura ah hmunhma a khuar mi SAC ralkap pawl an doh hna i ralkap 10 an thi, Captain 1 telh in 26 fak ngai in an i hliam tiah LLPDF nih thawng an thanh.
July 22 zinglei sml 3:00am hrawng ah Launglon peng, Nakandaw khua, Yatkhan pura umnak ah thazang chap ding in mawṭaw 3 le SAC ralkap 150 hrawng an rak phan i zinglei sml 6:20am hrawng ah Bahtu Column umnak hmun lei ah thazang tampi in kahdohnak an tuah caah mins 20 tluk kahdohnak a fak i PDF 3 an nunnak a liam, 1 fak tuk lo in aa hliam tiah theih a si.
Cun SAC ralkap pawl Khamaungtaung khuate in Tawminpyaung khuate lei an kal lio ah Bahto Column nih bomrap lung 4 an puah hnawh hna i SAC ralkap 10 an thi, 20 nak tlawm lo an i hliam tiah theih a si.
Cu SAC ralkap pawl cu Tawminpyaung khuate lei ah an lut ṭhan i mipi inn 3 an khangh tiah theih a si.
Cu ni chun sml 1:00pm luan hrawng ah Tawshay khua lei in a rak lut ṭhan mi SAC ralkap cu Phuaboh khuate lei ah hriamngan kah bu in an luh caah Bahto Column nih Drone in bom lung 8, kuttuah 79, 60MM hna in mins 30 tluk an kah ṭhan hna i SAC Captain 1 a hmai ah aa hliam bantuk in SAC ralkap 6 fak ngai in an i hliam tiah theih a si.
Bahto Column – LLPDF, DGRF C04, Ye Pyu PDF hna bawm in kahdohnak an tuah tiah theih a si.
About The Author
