Lawngtlai Peng Chung Ah SAC Ralhrang 278 An Ṭhan
Chinland Post | January 17, 2024 — SAC ralhrang le mipi ralkap cu Lawngtlai pengkomh Parva ral Myanmar ramchung ah an i kah caah 2024 January 17 zaanlei sml 4:00pm hrawng ah SAC ralhraang 278 cu Bandukbang Lawngtlai peng ah an hun zaam.
SAC ralhrang pawl hi Assam Rifle nih an tawlrel cuahmah hna. SAC ralhrang le mipi ralkap hi Karma tiva pawnghrawng ah an i kah hnu ah atu bantuk in SAC ralhrang pawl Lawngtlai peng ah an luh hi a si.
SAC ralhrang hi lutchap ding an um le um lo fiang in theih a si lo, asinain a lutchap ding mi an um lai tiah zumh a si. SA ralhrang nih hin an hriamnam an i ken chih.
India he ramri aa tlai mi Chin ramkulh ah 2023 November in 2024 January 2 tiang, kahdohnak voi 5 chung in ralkap an zaam hi a si i Assam Rifle nih an cohlan hna hnu ah an kuat ṭhan hna hi a si.
2023 November 12 ah India-Myanmar ramri, Rihkhawdar khua um ralkap sakhaan 2 cu CNA, CDF-Hualngoram, CDF-Thantlang le People Defense Army hna nih an kah. Kahdohnak chung in ralkap lei 34 cu Mizoram, Champhai pengkomh, Zawkhuathar ah an zaam. Anmah pawl cu Assam Rifle nih India ralkap Helicopter in Mongnai khua in Tamu ah an rak kuat hna.
Khampat-Tamau pawngkam kahnak ah SAC ralkap pawl Indiaram lei a tli mi zong an um chih.
November 15 ah Falam peng, Tibual ralkap sakhaan in ralkap 40 leng zong India ram ah an zaam. Mizoram, Tusentlang khua in Assam Rifle sin ah an i ap i cu hnu ah Myanmar ram, Tamu khua ah India ralkap Helicopter in an kuat `han hna.
2023 November 19 ah Matupi peng, Lailenpi khua hrambunh LIB 304 ralkap sakhaan cu Chin dothlennak phu pawl nih an lak lio ah ralkap chungtel 30 cu Mizoram, Siaha pengkomh ah an zaam ṭhan. Anmah pawl zong India ralkap Helicopter nih Myanmar ram ah an kuat `han hna tiah ramri khuasa pawl nih Mizzima ah an chim.
Paletwa peng, Myeik khuate pawng ah a um mi ralkap Point 377 sakhaan cu AA nih December 2 ah an kah hna i ralkap 15 cu Mizoram, Lawngtlai peng, Suisatlang khua in India ralkap sin ah an i dor. January 2 ah Lengpui vanlawng tual in ralkap Helicopter nih voi 2 an thir hna i Sittwe khua ah a kuat hna tiah All India Radio nih a thanh.
Cun Paletwa khua, Chinletwa sakhaan cu AA le MDF nih January 2 ah an lak lio ah ralkap 104 cu Mizoram, Siaha pengkomh chung ah an rak zaam. January 9 ah ralkap vanlawng nih Aizawl khua, Lengpui vanlawng tual ah a rak lak hna.
India ram chung a rak phan mi kawl ralkap hna kha Myanmar ram ah hramhram in va kuat ṭhan lo in anmah duhning tein tawlrel piak ding a si tiah India for Myanmar nih India cozah sin ah ca an kuat.
India central cozah pi nih SAC ralhrang lei tamh in tha tein donnak le sii a thlop hna hnu ah vanlawng in SAC ralkap pawl cu Myanmar ram lei ah a kuat `han lengmang hna.
