Lawngtlai Phan Ralzaam: Humhimnak Tha Tein Kan Ngeih Hnu Lawngah Kawlram Kan Kir Than Lai
TCP-Online| 2018 March 3| Kawl ralkap le AA hriamtlai phu pawl i dohnak ruangah Mizoram Lawngtlai lei a panhmi Chin/Rakhine ralzaam hna nih cun Kawlram chungah humhimnak tha tein kan hmuh hnu lawngah Kawlram lei kan kir te lai tiah an chim.
“Cozah nih ralzaam pawl humhim tein chiah a kan duh. Buainak um ti lo le humhim te in kan um khawh tak ding si cun kan ram te ah kir than kan duh ko. Nain, kan humhim khawh ding a si hlei lo cun kan kir ti lai lo” tiah Kawlram in a chuak i Lawngtlai ah ralzaam dirhmun in ummi Pu Kyawte nih a chim.
Mizoram in Kawlram ah a kir thanmi ralzaam pawl zong Kawlram an phak hnuah an nun a him hlei lo ti kan theih. Kawlram rak chuah tak lioah zeihmanh zong i put manh lo in mah le rawl funnak he lawng Mizoram a phanmi an tam.
“Zeihmanh put loin Mizoram kan phan. Hiti ning in Kawlram ah kir than sehlaw zeitindah nun hram kan domh than lai” tiah Pu Kyawte nih cun a chim.
Kan ram te ah kir than cu kan duh tuk ko. Nain, tuni tiang ral i dohnak a dongh tak rih lo tikah kan kir ngam rih lo zong a si tiah Rakhine miphun in U Maung Than Htwai nih a chim.
“Ral i tuknak a dih rih lo ca ah kan kir ngam rih lo. Hei kir hmanh sehlaw zaam thiamthaim kan hau rih lai. Cucaah, thil sining kan cithlat hnu in ral tuknak zong a um ti lo i kanmah pawl zong humhimte in nun hram kan thok khawh than si cung kan ram te ah kan kir than ko lai”.
Hiti Mizoram lei a phanmi ralzaam hna cu Mizoram cozah le khuami hna nih an eidin kong le an thut tonak kong ah tha tein tuanvo an lak hna ti kan theih.
Hi ralzaam hna cu Mizoram Lawngtlai peng Hmawngbuchhuah khuate ah a ummi an si i Kawlram lei in a rak zaam mi ralzaam minung 1000 leng an si hna. Ralzaam hna cu Chin ramkulh Paletwa um Chinmi hna le Rakhine minung hna an si ti kan theih.
Ref:Khonumthung
About The Author
