Lay-myo Tidil (Dam) An Sak Ah Cun Khuate 50 Leng Le Minung Thong Hnih Leng Harnak An Tong Kho
Salai CungCung|2019 November 5| Chin ramkulh Paletwa peng Lay-myo tiva a nganmi Tidil (Dam) an sak ah cun a pawngkam ummi khuate khua 51 ah ummi minung 2000 leng harnak an tong kho tiah Chin River Watch phu nih an chim.
Paletwa peng Lay-myo tiva ah Electric thazaang 622 MW chuah khawh ding in planning pakhat le Rakhine ramkulh ah Electric thazaang 105MW chuah khawhnak planning pahnih cu cozah lei nih timhtuahnak le chekfelnak an tuahnak konghe pehtlaih in Chin River Watch phu nih November 4 Yangon ah Media pawl he tonbiaruahnak ah tubantuk in an chim hi a si.
“Hi an timhtuahnak ruangah pawngkam ah a ummi khuate a tlawmbik khua 51 minung in thonghnih leng cu an umnak i thial ding phun khin an si. An i thial lo ah cun an inn le Lo Ti chung ah an pil kho. Hi planning cu cozah lei nih an tawlrel ko ah cun khuate mi hna hi Tiva kam ah pawcawnnak rian a tuan mi an si caah Tidil an thlah caan ah an rian pawl an tuan kho ti hna lo i rian ngei loin an um dih hna” tiah Chin River Watch in Secretary U Mang Za Khup nih a chim.
Lay-myo tiva pawngkam ah hin Chin miphun tampi umnak a si i Tiva pawngkam ah khuate zapi khua 60 leng an um, minung cazin in thongthum leng an umnak a si tiah kan theih.
“A dikfel mi federal Union pi kan hmuh khawh rih hlan chung cu tu bantuk in thil lianngan pipi an tuah mi hi cozah lei nih nawl an pek awk hna a si lo, tuah lo ding in kan hal hna” tiah a cunglei upa nih a chimchap.
Matupi Bungtla in a rak i thawk mi Paletwa peng, Rakhine ramkulkh lei ah a luan mi Laymyo tiva cung ah electric mei laknak planning cu 2009 kum lio ah Tuluk cozah nih sak ding in timh tuahnak an rak ngai i 2012 president U Tin Sen chan ah sak than lo in an rak um mi a si tiah kan theih.
Chin ramkulh cozah chimphuannak nawlngeitu Sipin minister U Soe Hteh nih “ tu lio cu tuah khawh ding dirhmun cu kan si lo, survey tiang lawng hi kan timh tuah rih mi a si. Survey data pawl zoh chun in ramkomh electric zung lei nih tuah ding a si an ti ah cun tuah a si te ko lai “ tiah a chim. (Ref.Khonumthung)
