Laykaykaw ralzaam camp ah omicron zawtnak a ngeimi hmuh a si
The Chinland Post | 2022 March 8 – Karen ram, Myawaddy ramṭhen, Laykaykaw ralzaam camp ah omicron zawtnak rungrul a ngeimi minung 30 leng hmuh a si caah zawtnak a ngeimi le zumh deuh lomi hna cu a dang te chiah dingah timhtuah a sinak kong le, sii-ai lei harnak a um tiah Karen Human Rights Group (KHRG) nih a thanh.
Myawaddy ramṭhen, Laykaykaw ralzaam camp ah mipi tampi in zawt a si caah omicron zawtnak aa chawnmi pawl zong an um tiah ngandamnak lei rianṭuantu pawl an hmuh. February 17 in February 25 tiang ah Laukaykaw ralzaam camp ah covid zawtnak zohfel a si i ralzaam 674 chung ah 35 sin in omicron zawtnak rungrul an hmuh.
Ralzaam hna hi a nikhua ruangah a zawmi an um bantuk in covid zawtnak aa chawn mi pawl zong an um tiah KHRG in biachimnak nawl a ngeitu Saw Nanda Suu nih a tanglei bantuk in a chim.
“An tlikzaamnak chungah ni 3 chung ruah a sur, ruahkhamnak zong ṭha tein an ngeih lo caah a zawmi zong an um. Omicron zawtnak aa chawnmi ralzaam zong an um. A luancia zarhkhat chungah a zawmi 70-80 leng an um. Mizaw pawl hi tar pawl zong an i tel bantuk in Fapawi liomi zong an i tel”.
“ A biapi in i dornak sak lio lawng a si. A tu bantuk in an i chawnh lio ah a dang tein chiah khawhnak a har deuh. Quarentine chiah a har ngai. Sii-ai lei bawmhchannak zong an herh tuk. An zawt chung vialte ruahkhamnak ṭha tein an herh. Ngandamnak lei rianṭuantu pawl zong tlamtling in ngeih a si lo. Cross Border Aid lei zong in harnak a um. A herhmi bawmhchannak zong an zawt hlan ah tuahpiak manh an si lo. A herhmi le a harnak cu tampi a um ko. Battalion-5 lei ralzaam camp zongah a zawmi an um ve. Sii-ai lei tampi bawmhchannak an herh ko”.
Laykaw lei kahdohnak ruangah inn hlam khawh loin ralzaammi khuami hna cu a phu in phu 10 hrawng an um i, minung 6,000 hrawng an si. Mah hmunhma hna ahcun covid zawtnak a karh. Covid zawtnak a ngeimi ralzaam pawl hna caah ngandamnak lei rianṭuantu pawl nih umnak hmunhma an tawlrelpiak hna lio a si tiah VOA Burmese News nih March 1 ah a langhter.
About The Author
