Lei-um Khua Zukalip Cinnak Ding Ah Hluttaw Speaker Le Minister Cheukhat Nih Kum 30 Chung Vawlei An I Hlan

0

Salai CungCung|2019 September 3| Bungzung pawng Lei-Um khua ah Zukalip (Eucalypti) cinnak ding caah vawlei hmun Ekah 100 cu cozah hmun hlanh mi ah Chin ramkulh Hluttaw Chairman Pu Zo Bawi, Minister Pu Sui Thio, Chin ramkulh Sipin Director hlun Pu Thla Hre, Minister Mang Hnin Dar hna nih an kum 30 chung  phungning in vawlei an i hlan chung tiah kan theih.

“Hi Zukalip kung kan cinnak hmun hi thingkung pakhat hmanh a um lonak a si i cozah sin ah phung ning tein kan hal mi hna a si, cun khuami zong nih hnatlaknak a kan ngeih pi mi hmun zong a si. Zukalip cin mi pawl cu Chin ramkulh minister pathum le kei mah tiin Lei-Um khua pawng ah kan tuah, kei hi  Ekah 15 in ka tuah ve. A tu kan cin mi Zukalip pawl cu mi dang nih an theih mi Ti chuahnak lei  ti a dop mi kung bantuk khi a si lo, inn saknak caah hman khawh mi kumthum ah a zami phun khi a si, kawlram lei zong ah tampi an cin cang hna. Hi Zukalip cinnak kan tuah mi cu tha tein ngunkhual kan pek peng mi a si” tiah Chin ramkulh Sipin Director hlun Pu Thla Hre nih The Chinland Post ah a chim.

“Hi Zukalip cinnak caah cozah thingram lei zung nih ngunkhual cu zat khat  nan tun lai a kan ti ning in kumkhat voikhat kan tun peng.  Hicinnak ah hin cozah lei nih minung pakhat nih cu zat nan cin lai a kan ti ning in kan cin ve, tu hi tai can hrawng an si cang hna i, hi hnu kumthum kumli ah cun an za cang lai. Pu Zo Bawi nih chim ning ah cun, hi pawl kan tuahnak a ruang cu hmailei Laimi zapi nih kan cawng ve hna seh law an mah le paw cawmnak cio ah hmang hna seh ti kan duh tiah a ti. Hi  Zukalip cu Lai tlang ah cin bal mi kung a si lo, kawlram ah cun cin hram an thawk i tu hi kumnga an cin cang hna. A tu kan cin mi Zukalip pawl cu cozah lei nih kumthum kumli tiang a kan zohpiak lai i pehzulh aa tlak ko an ti ah cun kum 30 tiang a kan pehzulh ter lai.  Asinain kan cin lai tiin an cin lo ah cun cozah lei zong an duh lo, cin hrimhrim a herh, cu kan cin mi pawl zong tha tein an cing hna maw timi a kan zoh piak than lai” tiah Pu Thla Hre nih a chim chap.

Hi kong he pehtlaih in Chin ramkulh Hluttaw Chairman Pu Zo Bawi nih ti hin Chin World ah a chim. “Hi hmun cu hramhram in kan lak mi a si lo, ralkap cozah chan in ralkap nih tlaihmi thingram hmun a si, tu hi thingkung pawl zong zeihmanh a um ti lo. Hi hmun ah hin Ekah 100 cu upadi ning tein kumkhat ah tangka 50000 ngunkhual kan pek i Zukalip  kung hi 60000 kan cin, cun cozah lei zong nih pungsan 7 an kan pek cang” tiah a chim.

Hi bantuk in Zukalip pawl cinnak Chin ramkulh ah kan tuah i tawlreba cinmi bantuk in kan tuah khawh ah cun Chin ramkulh chung in ramdang lei kal mi zong an tlawm deuh cang lai tiah a chim chap.+++

About The Author

Na ruahning rak langhter ve.. (Leave a comment)

%d bloggers like this: