Lei-um Khuami Le Cangva Khuakomh Nih Vice President Sin Ah Thil Phun 9 An Hal
City Hunter| 2018 May 24| Myanmar rampi Vice President Henry Van Thio le a hnuzultu hna cu Hakha in Gangaw lei an kir lei May 20 ah Hakha peng, Lei-um khuami le Cangva khuakomh nih thil phun 9 an hal tiah kan theih. Cu thil an halmi kong he pehtlai in The Chinland Post nih Lei-um khuabawi le Bungzung khuabawi pehtlaihnak kan tuah hna i a tanglei bantuk in an chim.
Lei-um Khuami nih thil phun 5 an halmi he pehtlai in Lei-um khuabawi Pu Sang Lian nih a tanglei bantuk in The Chinland Post ah a chim.
1. Siangniamrun lonh pek ding le a vaang pe 100 le a tung pe 30, (RC)tlakrawh in sakmi dot hnih sianginn sakpiak ding in an hal.
2. Dinti, thlaikheu, leikuang caah in khua in khan 4 aa hlatnak hmun See-khun tiva kha Tidil (Dam) tuahserpiak ding in an hal.
3. Surkhua kalnak motor lam cung ah a ummi Lei-um (A) khua pawng Riva tiva hlei donhpiak dingin an hal.
4. Kalay he i pehtlaihnak ding Lei-um (B) in Gangaw peng Htay-hlaw khuate kar pehtlaihnak khan 14 chung lam kauhpiak chap ding in an hal.
5. Ekah 100 a kaumi hmun pek le leikaung cawhpiak ding in an hal.
Cangva khuakomh nih an halmi phun 4 cu he pehtlai in Bungzung khuabawi Pu Chan Hre nih a tanglei bantuk in The Chinland Post ah a chim.
1. Cangva khuakomh nih pupa ro vawlei (dum le lo) kan ngeihmi ekah 1030 hrawng thingram hualmi chung i an khumh dih caah dum le lo tuah kho than ding le vawlei hmun pek than ding tawlrelpiak ding in an hal.
2. Gangaw le Kalay khi khan 100 fai aa hlat i taih-ne sii-inn 5 hrawng an ngei. Cu bantuk in Hakha le Gangaw hi khan 88 aa hlat nain taih-ne sii-inn pakhat hmanh kan ngei lo. Lakhruak in i khawndennak le zawtfahnak an ton caan ah i thlopbulnak kan ngei lo, lamhlatpi a simi Hakha tiang va tlun a hau tawn. Cucaah, Hakha le Gangaw kar ah taih-ne sii-inn pakhat tal chiahpiak le tawlrelpiak ding in an hal.
3. An-ta, Zipia le Zawngnak khua hi Matupi le Hakha peng chung ah a ummi an si. Asinain, Chinram cozah nih uk lo in Magwe ramthen nih a uk hna. Cu hlan ahcun anmah zong nih kan umnak hi Chinram a si timi an rak i hngalh lo pin ah Lai miphun kan si timi lungput a ngei lomi zong an tampi. Magwe ramthen nih uknak lei a tlaih hna lawng si lo in an khua in a chuakmi thil mansung, thingkung, ramkung vialte le ngunkhuai vialte zong Magwe ramthen ah a lut dih. Atu cu Chinram cozah nih ukmi si an duh pin ah Laitlang ah hmunkhuar in khuasak a duhmi cheukhat zong an um. Cucaah, anmah pawl caah hmunhma tawlrelpiak ding le Chinram cozah nih uknak lei tlaih cang ding in an hal.
4. Bungzung hi Chin ramkulh, Sagaing le Magwe ramthen ramri a si pin ah leitang chuak thil man sung le thing man sung tampi a chuahnak hmun pakhat zong a si. Cu ruang ah Van Kulh chan zong in khuapi ah sertimh a rak si cang. Cucaah, Bungzung hi ramri khuapi sinak (Myo) pekpiak ding le khuapi nganmi pakhat ah sersiampiak ding in an hal.
A cunglei langhtermi thil phun 9 halmi cu caan a um lo caah capek in an halmi le an lungduh hngalhternak an tuahmi a si tiah kan theih.
Cangva khuakomh ahhin khua 7 an um. Cu hna cu; Bungzung, Lei-um (A), Lei-um (B), Cangva, Chawncum, Keizuan le Tilak an si. Cangva khuakomh in minung 400 hrawng nih Vice President Henry Van Thio le a hnuzultu hna cu May 20 ah sunglawi ngai le Lai phungte in an don i chuntuah zong an tuahpiak. Bunzung vanlawng tual saknak ding hmunhma zong a zoh. Cun, Bungzung ah Mirang vawlei sehzung tuahnak ding hmun le thungrang lung (limestone) a chuahnak tlang zong a zoh. Bungzung hall ah a hnuzultu tuanvo ngeitu upa hna nih an riantuanmi thil sining fianternak an tuah hnu ah Vice President nih a herhmi chimhfiannak le biacahnak zong a ngeih hna tiah kan theih.
About The Author
