Leitak-Hmawngtlang Hmunhma Buainak Arannak in Tawlrelpiak An Duh; Inn Sakremh Kong ah Hmawngtlang nih Report An Tuah

TCP-Hakha| The Chinland Post| 2020 April 27| Leitak le Hmawngtlang innsak ruangah buainak hmunhma cu Cozah nih zeihmanh tuah hlah u tiin September, 2019 ah nawl an chuah cang nain Leitak lei in Pu Ling Kung nih a inn a thar in a sakremh caah Hmawngtlang khuabawi nih April 6, 2020 Chin ramkulh Cozah sin report a tuah i April 22-23, 2020 ah Thantlang penguk zung nih Ramkulh Cozah fialnak in chekhlatnak an tuah hna tiah thawng kan theih.

Hi buainak kong he pehtlai in Thawngthawng Zathang nih Thantlang Peng MP Palai Pakhat a bia cu khuaruah har ngai a si tiin April 22, 2020 Facebook ah “MP Ni Sui Lian nih a thawh i U Ting Awng Win (Thantlang peng uk chang) lei ah “1. Milih hrawkhrol hna ruangah, 2. Mynone nih ngerh-ngawih in zeihmanh nan tuan lo raungah, 3. Chin Pyine a cozah hi mipi cozah an si nain kum thum chung zeihmanh an tuah mi a um lo ruangah hi thil hi a cang”, tiah a ti colh ko. Cu le cang ka cun U Tin Aung Win (Deputy Township Administrator) nih, “mah ti hin bia chim hlah, mah hi cozah nih tuah hlah u tiah a hram thawk tein an ti mi a si. Cozah nawl ngaih loin le phungning lo hramhram in an tuah chih caah hi tin a buainak hi a si. Cun kannih cu cunglei in an kan fial ning tein rian kan tuan ko, na duh a si ahcun mah bia hi cunglei cozah sin ah va chim hna”, tiah MP Ni Sui Lian cu a ti ve. Cun Hmawngtlang Khuabawi pa zong nih MP Pi Ni Sui Lian cu, “milih le hrawkhrol na ti mi hi a ho te dah na ti duhnak hna si’, tiah a hal i an mah pahnih zong thalo ngai in an i chawn ve. Hi ka zawn ah ka chim duhmi cu kan lai MP pakhat asi mi nih a rak zulh ve hna tikah aw a tha ngai remdaihnak he thilhman chuah khawhnak lai a kan remh chunh lai tiah tampi khuami nih an i ruah chih lio ah hi bantuk in MP pakhat nih kaptanh ngeih in le cozah dohkalhnak in bia a chim ko tikah hin cun kan lau i kan khua ruah a har ngai ko. MP pakhat dirhmun he zong a tlak lo ngai in ka hmu. Kan konglam hi cozah nih a rannak in a kan tlangtlak lo ah cun buai chinchin dawh kan si ko cang. Kan cozah pi nih a rannak in a kan tlangtlak i remdaihnak he thil hman a chuah khoh zaunak lai thlacam kan bawm ve hram u law” tiah a langhter.

Hi kong he pehtlai in Hmawngtlang Khuakomh (Ohsuh) Chairman Pu That Vung nih, “Leitak hi 2017-19 ah inn (35) an sak hnu in Cozah nih sa ti hlah u an kan ti. Cu ningin kan sa tilo. Pu Kung Ling inn hi 2017 ah an rak sak ciami a si. A thar a sak silo in a innthing a theh i a ngan deuh in a sakmi a si. Furpi atlak cang lai caah a innthing ngan deuh in a remhmi a si. Kanmah tha tein a kan theihtermi a si ko” tiah khuakomh rianngeitu Ohsoh Pu That Vung nih The Chinland Post ah a chim.

“MP Ni Sui Lian nih mizapi thimmi Cozah sinak lakah mizapi zawn an ruat lo, Rian ka tlaih hnu kum (3) chung zeihmanh an tuahmi a um lo. Ngerngawi in rian an tuan ruangah hi thil hi a cang ti zong a chim. A chimmi ah U Tin Aung Win nih kan nih cu cunglei fialmi rian kan tuan. Na duh a si ahcun cunglei ah va chimh hna a ti i a si ko a hmanmi a si a ti I an dai ko” tiah a biapeh ah a chim.

Hmawngtlang Leitak Innhmun Buainak ah Pu Ling Kung inn/Thawngthawng Zaathang FB

“Pu Ling Kung nih inn thar a sa hrim lo. A inn cu ahme deuh, thutdirnak athat tilo caah remh a herhmi a si. Ka theihning ah Thantlang penguk chang a rak phan lai i Leitak khuabawi (tuanvo ngei) le Hmawngtlang khuabawi (tuanvo ngei) chuah lo ding le holh lo ding a ti. Ohsuh chairman, Cazi le anmah zung lei lawng nih biachim ding an timi a si. Sihmanhsehlaw Hmawngtlang khuabawi cu a holh len. kum (3) kan buai cang I zeihmanh bia an kan chahpiak ballo. Kan buai than rih suallai ti ka phang I a rannak in tawlrelpiak kan duh” Leitak khuabawi Pu Ngun Cung nih The Chinland Post ah a chim.

“A tu Leitak le Hmawngtlang kan buainak hmunhma ahkhin zeihmanh nan tuah ti lai lo tiah September, 2019 ah Peng Cozah nih a kan auhnak ah ca he bia he a kan pek i a um cang mi a si. Culio ah Khua ifonh ulaw Myo kan in pek hna lai an kan ti. Leitak lei in Leitak asiloah Zophei Myo tbk an ti tikah Leitak asiloah Hmawngtlang a si lomi Myo hmuh le hmuh lo cu kan ti i kan duh lo. Pu Ling Kung nih a innhmun, innthing kha a thar in JCB in a cawh i a sak than tikah tuah hlah u tiah Cozah nih an ti komi a tuah caah Cozah sin ah ka report mi a si” tiah Hmawngtlang khuabawi Pu Van Biak Thawng nih The Chinland Post ah a chim.

“April 22 an rak phak lio cu ka va kal ve i Peng uktu chang U Tin Aung Win nih ziah a thar pei nan sak ko hi a ti tik hna ah misual an si lo. Inntek an si caah a herh zawn in kan um ko lai ta an ti. Mi zertian mi kiakkawi an um ruangah hi bantuk thil a cangmi a si tiah kan MP nu nih a chim. Keimah zong report a tuahtu na si maw a ka ti i ka si ka ti. Penguk chang sin zongah Cozah santlai lo a ti i cu bantuk bia chim hlah, hlathlai lawng a rami kan si a ti. Chim duhmi cu Cozah nih zeihmanh tuah hlah u timi an tuah ruangah khan a si ko” tiah a biapeh ah a chim.

“April 22, 2020 Thantlang peng uktu chang U Tin Aung Win hruaimi Sipin, Lamzung, vawlei tah zung, upadi le a dang zung riantuan minung (2) an zapi minung (7) Leitak inn thar an sak tiah 6.4.2020 report a um caah zohfel hlathlai dingin cunglei order in kal an itim ka theih I ka ra ve lai tiah Phone in ka chimh hna i motor (2) in kan kal. Mizapi nih an aiawh caah tuanvo nan ka khinh bang mizapi nih thimmi Cozah, Vuanci le zungkip mizapi ca rian an tuan tikah dikfel in rian an tuan le tuan lo, thleidan nekneihnak, eihmuarnak, ziknawhnak a umnak hnga lo le zalong tein chimrelnak nawl an pek hna le pek hna lo, a bik in khuate khuasa sifak santlai lo zeitheih hngalhnak a ngei lomi cungah hrocer le thinphan thlalau in an tuah sual hna maw tbk tete a um lonak ding ah mizapi he ibawmh in ngiathlaitu (check and balance) uah hi kanmah MP rian bak a si caah vuanvo pekmi hna nih an ka sawm lo nain ka kal ve hrimhrim mi a si. Leitak nih innthar an sak le sak lo ka thei lo I chim awk zong ka thei lo. Theih ka timmi zong a si lo.” tiah MP Ni Sui Lian nih The Chinland Post ah a chim.

“Leitak le Hmawngtlang remhdaihnak le thilhman a chuah khawhnak lai remhchunh dingin tuanvo pekmi zong ka si fawn lo I biachahnak nawl a ngeimi zong ka si lo. Kaptanh ka ngeih zongah biachahnak ah san a tlai hlei lai lo. Mizapi nih nan aiawh in rian khinhmi Khuabawi, biaknak le hruaitu, MP pawl a dangdang thim tikah an tuanbia aa dawh le dawh lo, a bik in santlai lo hna cungah zanruahnak a ngeimi an si le silo hi zohthiam le ruahthiam hi a biapi tuk. Minung pakhat nih a lih, a hman timi chim mi paoh kan zumh colh ahcun mizapi tu sunghnak kan ton ding a si. Mipi thimmi Cozah kha mipi aiawh tu a si ve mi MP nih a hmuhmi thil kha raltha tein a hmanmi chim le phuan kha kan rian a si. Cucu Democracy a muru cu a si ko” tiah a biapeh ah a chim.

Hi kong he pehtlai in Hmawngtlang le Leitak Innsaknak hmunhma buaimi tawlreltu Chin ramkulh Tuanvo ngei Vuanci Mang Hen Dal nih “ An kong kan ceih kan tawlrel cuahmah lawng a si rih. Zeihmanh aa fiang rihlo” tiah The Chinland Post ah a chim.

“Hi bantuk kaphnih kar bia a daih khawh lomi hi Chin ramkulh Cozah uknak zung (Htwe-oh) pawl nih dikthlir in rian an tuan lo le khuakhat lawng tanh in an kalpi caah a si.” tiah min langhter duhlo Leitak upa pakhat nih The Chinland Post ah a chim.

Leitak le Hmawngtlang innsaknak hmunhma hi Leitak Lungbiava le Bileikhurva tiva karlak a si I hi buainak ruangah Chin ramkulh Cozah, Ramkomh zung, Daw Aung San Suh Kyi sin tiang report a phan balmi a si cang. Nihin ni tiangah Chin ramkulh Cozah Vuanci Mang Hen Dal hruainak in tawlrel cuahmah an si nain daihnak ngaingai an ser kho rih lo tiah theih a si. Hi report nak hi zeitik dah result aa thei lai ti cu chim khawh a si rih lo.