Lemcang Man A Hmuhmi Chung In Ks. Sing 20 A Hlutu Academy Eaindra Kyaw Zin
The Chinland Post| 2018 October 31| Academy Eaindra Kyaw Zin nih atu lio aa thlakmi baisakup muicawl in lemcang tuahtuan man chung in ks. sing 20 a hlut. Eaindra Kyaw Zin hi zungmawi lamthluan ah lemcang rian a tuan bantuk in a duhdawtmi a fale zong naihniamte in a zohkhenhtu hna a si.
Lemcang thiam fidi Academy Eaindra Kyaw Zin cu atu hi “Pu Tow Kyi fapa fapa lai” (“ဦးတုိးႀကီးသား အလတ္ေကာင္”) timi baisakup muicawl ah lemcang thiam fitlaw Academy Nay Toe he an i thlati. Hi baisakup muicawl i lemcang tuahtuan man a hmuhmi chung in ks. sing 20 cu Popa khua I Pyi Aung San phungki sianginn ah a hlut tiah theih a si.
“Popa khua ah a ummi Pyi Aung San phungki sianginn i rawlchuannak inn saknak caah ks. sing 20 ka hlut. Atu kaa thlakmi muicawl tuahtuan man chung in ka hlut hna hi a si” tiah October 31 chun ah amah facebook cahmai ah a taar.
Eaindra Kyaw Zin cu a fale a zohkhenh pah hna bu in a huammi zungmawi rian a tuanchihtu zong a si. Baisakup muicawl pawl aa thlami Eaindra Kyaw Zin cu kan hnu thla ahkhan “Hit Taing” (“ဟစ္တိုင္”) timi baisakup muicawl tlamtlingte in aa thla kho dih.
Eaindra Kyaw Zin hi 1996, kumkhat chung ah MISS KOKKINE & MISS CHRISTMAS timi laksawng phunhnih a cotu Miss pakhat zong a rak si. Amah hi zungmawi lamthluan chung ah a hlawhtling ngaimi lemcang tuahthiam pakhat dirhmun he fekte in a dir khomi pakhat a si. 2004 kum ah “Mitpar Ngei Vancung” (“မ်က္ႏွာမ်ားတဲ့ မိုးေကာင္းကင္”) timi baisakup muicawl le 2017 ah “Thinlung Chung i Namte” (“ရင္ဘက္ထဲကဓား”) timi muicawl in academy laksawng a cotu zong a si.
Eaindra Kyaw Zin hi lemcang thiam Pyay Ti Oo he 2011 January 1 ah an i thi-um. Atu ahcun an i thit-umnak le chungkhar thar an dirhnak hi kum 6 renglo a si cang. Atu hi a pasal Pyay Ti Oo he duh a nungmi kum 7 fanu pakhat le fapa pakhat te an ngei.
Ref: Duwun
About The Author
