Lothlo Bu Nih Upadi Kan Fiang Nain Cozah Nih Upadi Nan Fiang Lo; Pi Za Tlem
Salai Elvis| 2019 January 24|Fiang tein chim ko ah cun lothlo bu nih hin Upadi kan i fiang tuk nain Chin ramkulh cozah nih uapdi nan i fiang lo’ tiah January 24 Hakha Town Hall ah tuahmi Hakha khuachung sersiamnak kong Cozah le mizapi ton biaruahnak ah a tu bantuk in Pi Za Tlem nih a chim hi a si.
“Vawlei kongkau Upadi chungah ‘vawlei ngeitu hna he tonnak le hnatlak hnu lawng ah’ tiah aa tial. Cucaah cozah le mizapi karlak buaibainak a chuah lo nak ding caah upadi a rak um. Asinain, Town Planning Committee lei nih vawlei hmunhma a ngeitu hna cu voi zeizat dah nan kan ton i voi zeizat ko dah theihternak nan kan tuah bal? timi hal kan duh hna. Hakha khuachung a ummi cu thancho a duhmi lawngte kan si ko. Upadi ningtein nan tuahtuan ah cun Chin ramkulh hi a thangcho ko lai. Upadi ningtein kan tawlrel ko u” tiah Lothlo bu ai-awh in MP hlun Pi Za Tlem nih a chim.
“Mi pumpak nan i uahfeih ruangah’ tiin CM Salai Lian Luai nih a chimmi kongah “mi pumpak maw kan i uahfeih, cozah dah nan i uah feih deuh’ timi Chin ramkulh Chief Minister Salai Lian Luai sin ah biahalnak zong a tuah.
‘Pupa ram kong zong chim ah cun chun nitlak kan chim khawh. Pupa ram timi zong a hlan ah a rak um i cucu zuarnak nawl zong an ngei i thenhpeknak nawl zong an ngei. Upadi ningin kan i ngeihmi kan vawlei zong a si. Asinain, hmun ngeitu theihternak le tonta hmasa lo in cozah nih chuh ding timi cu cozah nan rian a si tak maw” tiah Pi Za Tlem nihcun biahalnak zong a tuah hna.
Hluttaw Speaker Pu Zo Bawi chimmi chung ah, “pupa ram a ngeimi hna le a cawtu hna zong kha hmunkhat teah ton hna i lungtlinnak tuah hmasa ah cun a si kho lo ding a um lo a timi kongah’ Pi Za Tlem nih Pupa ram ngeimi hna he ton biaruahnak nan kan tuah lo caah a tubantuk in kan buaibainak hi a si ko. Cun “hika hmun a rami hna nih hin hna nan kan hnawh” ti na chimmi cu upa hruaitu pakhat nih chim awk a si lo, ngeih zong a nuam lo ngai mi a si” tiah Pu Zo Bawi chimmi cungah Pi Za Tlem nih bialehnak tuah pah in a chim.
Atu bantuk in tonbiaruahnak kan tuah hnawhchan cu, “Town Plan kong hi a ran khawh chung le upadi ning in kan tuanchuah khawhnak ding ah kan i zuam hna lai tiin ton biaruahnak kan tuah hi a si. Town Plan Committee chungah hin Hakha khua kong le thil sining a hngalmi zong an um ko. Kanmah ruahnak le tawlrelnak lawng in kan suaisam mi a si bak lo. Vawlei le a hmun a simi hna cu upadi ningin liamhrulhnak zong kan tuah ko lai” tiah CM Salai Lian Luai nih donghnak biacah ah a chim.
