Lt. Col Hrang Thio Thlan Cu Falam Town Master Plan Pangpar Dum Chungah An Thial Lai

0

Salai Elvis| 2018 October 31| Kawlram huap in raldohnak ah minthang pakhat a si mi Lt.Col Hrang Thio a thlan cu Falam khua kauhmi hmunthar ah an thial lai tiah theih a si.

Lt.Col Hrang Thio thlan cu a tu lio ah Thanhniar (chak) khuahlun ah a um i hmunthar ah thial dingin October 29 chungkhat hna le Falam penguk zung hna cu tonnak an ngei.

“Lt.Col Hrang Thio thlan hmun ah penguk zung sak ding a si i chungkhar hna nih vawlei cu lungtling tein an kan pek cang. Hmunhma a kan petu chungkhar le thlan hmun kong tuanvo ngeitu cung ah kan i lawm. Hi bantuk lungput in kan tanrual ah cun Falam khua karhnak ding Project cu hlawhtling tak in kan tuah khawh peng ko lai” tiah Penguk zung AD Pu Ca Awi nih a chim.

Lt.Col Hrang Thio thlan hmun ah penguk zung dot hnih sak ding in timhtuah a si i Lt.Col Hrang Thio thlan thar an thialnak ding hmun cu Falam Town Master Plan chung i pangpar dum chungah chiahpiak dingin kaphnih lungtlin nak an ngei.

“A thlan a bit kauh cu a hlan ning tein kan tuah ko lai i dawhdeuh in kan tamhmoih te lai. A thlan cu sing 100 dih in kan tuah than lai i a tuanbia te hna zong kan tial chap lai. 2019 August 8, Town Hall ah ruak thlahnak caan kan tuah te lai” tiah chungkhat a si mi Rev. Don Hre Dun nih a chim.

Lt.Col Hrang Thio a rak thih lio ah Bogyoke Aung San le Martyr (Aa-za-ni hruaitu hna) thlan hmun rak tuahding a si nain Lai phung ning in a ruhro pawl Lairam ah phum an duh caah a ruak cu Falam khua ah an rak tlunpi hi a si.
2019 August 8 ah Lt.Col Hrang Thio thlan thar an thialmi cu dih ding le sunglawi ngai in hunnak tuah an timh tiah kan theih.

Lt.Col Hrang Thio cu 1949 kum August 6 ni Hmaw-bi ram ah raltuknak chung in hliamhma fak ngai in a pu i August 8 zinglei suimilam 5:30 ah a nunnak a rak liam.
Ref: Chinland Herlad, Iprd Falam

About The Author

Na ruahning rak langhter ve.. (Leave a comment)

%d bloggers like this: