Lt. Gen. Moe Myint Tun Le Brigadier General Yan Naing Soe Cu Thong Kum 20 Thlak Ding In Bia An Khiah
The ChinandPost | October 11, 2023 — SAC bawizik Min Aung Hlaing nih a zumh ngai mi SAC lutlai eihmurnak siangpahrang Lt. General Moe Myint Tun le amah hnuzul-orhlei kut a si mi Brigadier General eihmurnak he pehtlai in thong 20 thlak an si tiah ralhrang lei chung in thawngtheih a si.
Myanmar kyat tangka man ngei lo a umnak kong hna dothlat ding in SAC bawizik nih bia cahnak a ngeih hnu in a leng lei Sui zuar, dollar zuar, rampi mualphoternak, zulhphung buarnak, a dik lo ning in laksawng laknak, phungning lo in ramdang tangka i chiahnak telh in muaphawtnak dangdang he Lieutenant General Moe Myint Tun le Brigadier General Yan Naing Soe cu thong kum 20 thlak ding in nawl an chuah hi a si.
General Yan Naing Soe hi Lt. General Moe Myint Tun a kut khatlei bantuk aa bochan ngai mi minung a si. SAC lei nih an rak tlaih mi sipuazi rianṭuan mirum hna lei Myawaddy bank, Myanmar Economic Corporation le SAC nih a tuah mi sipuazi rianṭuannak lei lutlai tampi nih Lt. Gen Moe Myint Tun cu tangka zikhnawh an pek. Lt. Gen. Moe Myint Tun cu Myanmar Investment Commission (MIC), Central Committee for the Fair and Speedy Flow of Trade and Goods le Foreign Exchange Supervisory Committee (FESC) ah chairman a sinak hmangin eihmurnak a tam caah atu bantukin SAC nih tong an thlaknak an tuah hi a si. Central Committee for the Fair and Speedy Flow of Trade and Goods ah chungtel a si mi Brigadier General Yan Naung Soe zong nunchung thong thlak dingin bia an khiah ve. Brigadier General Yan Naung Soe hi Moe Myint Tun i a orhlei kut a si.
Lt. Gen. Moe Myint Tun cu Myanmar Military (Tatmadaw) ah a reng (rank) sangbik paruknak a si. Amah cung ah Senior General Min Aung Hlaing, Vice Senior General Soe Win, General Maung Maung Aye (Chief of General Staff for the Myanmar army, navy, and air force), General Moe Aung (commander-in-chief of the Myanmar Navy) le General Tun Aung (commander-in-chief of the Myanmar Air Force) lawng an um.
Lt. Gen Moe Myint Tun hi SAC lutlai phun nawlngei mi 18 chung ah Min Aung Hlaing hruaimi council upa ah a pa 5nak nawl ngei mi a si.
