Lt.Sui Uk Fapa  Min Lian Uk Le  A Nu Damte In Sii-inn In An Chuak Cang

Salai Elvis| 2019 March 21| March 18 zan ah a nunnak a liammi Chin National Army(CNA) ralkap Lieutenant Sui Uk (kum 35) fapa Min Lian Uk le a nupi Ngun Tha Dim cu ngandamte in March 20 ah Thantlang sii-inn in an chuak cang tiah kan theih.

“March 20 ah sii-inn in kan chuak cang. Dam tein kan um ah cun thazing March 22 kan khua Farrawn ah tlun kan i tim. Ka fapa te cu a min hi ka pa le ka ta pa nih an i sak i ka pa nih Min Lian Uk a ti i ka tapa nih Bawi Lian Uk tiah aa sak ve. Asinain, kan pa nih ka pa minsak mi ‘Min Lian Uk’ hi a duh deuh caah Min Lian Uk tiah kan feh ter in kan auh ko lai” tiah Lt. Sui Uk nupi Ngun Tha Dim nih TCP ah a chim.

Lt. Sui Uk le an nu Ngun Tha Dim cu nau ngeih dingin March 10 ah Thantlang sii-inn ah an ra i March 11 zanlei hnu in sii-inn ah an it. March 12 zinglei suimilam 4:00 ah Min Lian Uk cu Operation tuah in le dam tein an ngeihter. An pa Sui Uk cu March 14 ni ah a thawchuah a har i a khuh pah tikah Hakha sii-inn ah an kalpi i Hakha ah a nunnak a liam hi a si.

“March 14 (nili ni) ah khan  a thaw a chuahmi kha a har deuh, cun a khuh pah fawn tikah Doctor te nih an zoh i Oxygen pek lo cun a um kho ti lo tikah ni khat hnu ni khat a zual deuhdeuh caah Hakha sii-inn ah cun an kal pi. Hakha sii-inn an phak pi tikah cun a thi a reu dih ti a si. Cu tikah thi cu laang hnih an rawnh, a thaizing ah cun a nunnak a liam hi a si. Atu i a nunnak a liam nak le a zawtnak cem zei set dah  a si timi an kan chimh ve lo caah mah vial cu ka theih tawk a si. A kal hi a tha lo i hmai thla ah hin Yangon ah piah aa tim nain…” tiah a nupi nih a chimchap.

Lt. Sui Uk cu Thantlang peng Farrawn khuami Pu Hrang Bik le Pi Ngun Thluai hna i an fanu Mai Ngun Tha Dim he 2017 kum December 18 ni ah a thiangmi thitumnak an rak tuah. 2019 March 12 ni ah Thantlang sii-inn ah nau ngei dingin an ra. Atu a thla tling rih lomi Min Lian Uk te lawng hi fa an ngeihmi a si.

2016 kum lio in pumpak ngandam lo nak ruangah sii-ai aa thlopbul mi cu a dam lei panh ziah mah an ti ko nain 2019 March 18 zan suimilam 8:00 Hakha sii-inn ah a nunnak a liam hi a si. Lt. Sui Uk cu a pa Pu Khua Hram@Khine Maung Swe le Pi Iang Chin hna i an fa pathumnak a si.

1982 kum Hakha peng Phaizawng khua ah a chuak i New Delhi ah B.Th a cawn lio 2011 April 14 ah ram le miphun caah tiin CNA ah a lut. KIA ah Cadet Training zong tlamtling tein a rak kai pin ah a rian a tlamtlinh i upat mi pasal tha pakhat zong a si.

Amah cu Kachin ram raltuknak a tlun in Tluangram CNA camp ah commander siseh, Tedim peng Zimte ah second Commander a tuan lio ah atu bantuk in ram le miphun ah a nun a pek hi a si. A ruak cu Kalay peng Kyarinn lei ah an tlun pi i March 19 ni ah an vui tiah kan theih.