Lungkhin Khua Ah Inn A Kaang I Kum 7 Ngakchia Khua Za Uk A Thi

TCP-Hakha| 2019 March 28| March 21 zenglei suimilam 11:00 hrawng, Hakha peng, Lungthin khua ah motor cycle cung chiahmi datsii pung in mei kanghnak a chuak i mei kangh hliamhma in kum 7 ngakchia Khua Za Uk a thi tiah kan theih.

“Lungkhin khuami Aung Za Ling cu Bawinu tiva ngatlaihnak in inn lei ah a rak tin. Cun, a cycle cu an inntang dawr pawng ah a chiah. A cycle engine a linh tuk ruang ah a hmailei i aa tlaimi datsii pung kha mei a tlaih colh. Cu ruang ah an inn canphio khammi le thingrua pawl mei nih a hun tlaih i cycle le inn pakhat cu ciamlak in a kaang. Suimilam 11:40am tluk ah mei cu an thah khawh than” tiah Hakha palek sakhaan in tuanvo ngeitu pakhat nih The Chinland Post ah a chim.

Hi mei kanghnak ruang ah mei kanghnak dawr a phanmi KG cawng lio Pa Khua Za Uk (kum 7) cu mei kangh hliamhma in a thi. Aung Za Ling zong mei nih a ke tlawmpal a kangh ve. Hi kong ahmuh (case) cu Surkhua palek saakhanhmu nih a tawlrel i hmalaknak a tuah.

Hi mei kanghnak kong ah Aung Za Ling cu Ya-za-tat-gyi pohmah 304-A/338/285 in ahmuh (case) hunpiak a si. Atu hi an tawlrel cuahmh liopi a si tiah Hakha Palek sakhanhmu- Bohmu Myint Zaw sin in kan theih.

March 22 zan Mindat zong ah inn 4 a kaang. 2018 January 1 in 2019 March 21 tiang Chin ramkulh ah sianginn pakhat telhchih in inn 46 a kang cang i minung 3 an thi cang. Atu tan Lungkhin khua mei kanghnak he hin cun a thimi minung 4 an si cang tiah Chin ramkulh meithat zung cazin ning in kan theih.

Photo: Chin Journal

Na ruahning rak langhter ve.. (Leave a comment)

%d bloggers like this: