Lungkua Chung In Chanhchuahmi Ngakchia 13 Cu Sii-inn In An Chuak Kho Cang Lai

0

City Hunter| 2018 July 18| Thai ram Tham Luang lungkua chung ah aa taap i chanhchuahmi ngakchia 13 cu nunchanhnak rian a tuan lio a thimi tilio thiam Saman Kunan caah sii-inn chung ah an ngaihchiatnak an langhter. Ngakchia hna cu thaizing (July 19) ah sii-inn in an chuak kho cang lai tiah theih a si.

Tilio thiam Saman Kunan cu lungkua chung ah aa taapmi ngakchia hna oxygen dur a va pekchanh hna hnu a chuahlei ah oxygen nih a dihtak i July 6 ahkhan a thi. Cu a thimi pa Saman Kunan kong cu July 14 lawng ahkhan ngakchia hna cu hngalhter le chimh an si.

Ngakchia hna nih cu kong an theih bak in an ngaihchia tuk i an tap. Ngakchia hna nih Saman Kunan muisam he aa lomi muitawn cung ah an ngaihchiatnak kong an tial i amah caah minute pakhat tluk daite in an um tiah ngandamnak lei ministry zung in tuanvo ngeitu Jedsada Chokdamrongsuk nih July 15 ah a chim.

Tham Luang lungkua chung in chanchuahmi ngakchia 13 cu lenglei he chunglei hi an ngandamnak dirhmun a tha cang. Cucaah, July 19 ah sii-inn in an zapi an chuak kho cang lai tiah ngandamnak lei minister Piyasakol Sakolsatayadorn nih July 14 ah a chim.

Sii-inn in an chuah tikah thate in zohkhenh khawhnak caah ngakchia he an chungkhar hna he ahlankan in timhtuah a herh. Ngakchia thinlung lei ngandamnak caah media pawl he ton biaruahnak nan cohlang lai lo i ton biaruahnak nan ngeihter hna lai lo ti zong chungkhar pawl bia a cah chih hna.

Lungkua chung in ngakchia pawl an chuah hna ahhin pound 4 cio an khingrih a zor. Ngakchia 12 hi kum 11 in kum 17 kar an si, an saya (coach) pa hi kum 25 a si. June 23 ahkhan Thai le Myanmar ramri Chiang Rai pengkomh Mae Sai khua pawng Tham Luang lungkua chung ah an lut. Cuti an luh lio ah lungkua chung ah ti a luh caah chuak kho ti lo in an taap. Cu cangka in ngakchia kawlnak rian an thawk colh i ni 9 a rauh hnu a ni 10nak July 2 zan ah nunchanhnak riantuantu Britain tilio thiam pahnih nih a hmasa bik an hmuh hna. Cu hnu ah lungkua chung in chanchuahnak rian cu Myanmar ram telh in ramkip bawmhchanhnak in an thawk.

Ngakchia hna cu; a nikhatnak July 8 ah minung pali, a nihnihnak July 9 ah minung pali le a donghnak bik July 10 ah minung panga, an zapite in lungkua ah an chuah khawh dih hna. Lungkua chung in an chuah cangka hna in lungkua he khan 50 tluk aa hlatnak Chiang Rai sii-inn ah helicopter in an kalpi hna.

ti lio thiam Saman Kunan

Tham Luang lungkua chung ah aa tapmi ngakchia pakhat le an saya pa hi Myanmar ram chuak an si tiah theih a si. Anmah pahnih tel in lungkua chung in chanchuahmi ngakchia pali cu ram ngei lo an si lo caah Thai cozah nih Thai rammi sinak cohlan le pek ding in a chekhlat hna tiah theih a si.
Ref: Duwun

About The Author

Na ruahning rak langhter ve.. (Leave a comment)

%d bloggers like this: