Lungkua Chung In Ngakchia 8 An Chuahpi Cang Hna; Thaizing Ah Nunchanhnak Rian An Pehzulh Lai
City Hunter | 2018 July 9| Thailand ram Tham Luang lungkua chung ah aa taapmi ngakchia 13 cu July 8 ahkhan chanchuahnak rian an thawk i a nihnihnak July 9 zan tiang ah minung 8 an chuahpi khawh cang hna. A nihnihnak nunchanhnak rian cu an i din than cang tiah theih a si.
“Tham Luang lungkua chung ah aa taapmi ngakchia 13 cu July 8 zingka in leng ah chuahpinak rian kan thawk i July 8 zan ah minung pali kan chuahpi khawh hna. A nihnihnak July 9 suimilam 11:00 in kan thawk than i minung pali kan chuah chap khawh than cang hna. Atu cu nunchanhnak rian kan i dinh cang caah July 10 ah kan thawk than te lai. A nihnihnak tiang lungkua chung in kan chuahpi khawhmi ngakchia zapi hi minung 8 an si cang. A nikhatnak ah kan chuahmi ngakchia hna zong an ngan a dam ko. A nithumnak zong atu chanhchuahnak riantuantu tilio thiam hna lila nihin pehzulh in an tuanchuah khawh ko lai” tiah Thai cozah in Pyi-htay-zi minister Anupong Paojina nih a chim.
Lungkua chung in ngakchia an chanhchuah ciami 8 cu an chungkhar hna he zong an hmuhton rih hna lo. Cun, atu a chuak ciami ngakchia hi ahoho dah an si i a taangmi ngakchia 5 hi ahodah an si timi min cazin zong Thai cozah nih an thanh duh rih lo. Asinain, an saya (coach) aa tel tiah theih a si.
Chanhchuahnak rian ah ramdangmi tilio thiam 50, Thai tilio thiam 40 tiang thazaang an chap. An chuah ciami ngakchia hna cu lungkua he khan 50 hrawng aa hlatnak Chiang Rai sii-inn ah helicopter in an kalpi hna. A nihnihnak tiang ah ngakchia pariat chanchuah pi khawh an sinak kong cu Thai Navy Seal facebook page zong ah official te in an
thanh.
July 6 zingka ahkhan ngakchia pawl lungkua chung ah oxygen dur a pechaantu Thailand ti ralkap bawi hlun a simi tilio thiam pa Gunan cu lungkua chung ah a thi. Ngakchia pawl oxygen dur a pekchanh hna hnu a kir lei ah oxygen dur aa kenmi nih a dihtak ruang ah a thi tiah theih a si.
Hi ngakchia 13 cu June 23 ahkhan lungkua chung ah an luhnak in atu bantuk in an taapnak hi a si.
Ref: Thai Navy Seal, VOA, Reuters, CNN
About The Author
