Lungkua Chungah A Taangmi Thai Ngakchia Minung 13 Chuah Khawh Nakding Caan A Rau Kho Rih
TCP-Online| 2018 July 4| June 23 ni ah Thai football team ngakchia 12 le an saya pakhat cu Chiang Rai pengkomh, Doi Nang Non tlangthluan- Tham Luang Nang Non timi lungkua chung an lut i ruah sur i ti a lianh caah chuak kho ti loin lungkua chung ah an taang. Khan 6 tluk a saumi lungkua chungah tilio thiammi hna nih an kawl len hna i an hmuh cang hna. Nain, ti a lianh caah ngakchia pawl bel chuah kho rih lo in an um.
Chanchuahtu dingah Thailand cozah lawng si loin, US, Australia, British le Tuluk ram tel in vawleicung lungkua lei thiamsang hna nih chanhchuah dingin a lam an kawl. Lungkua luhnak in pe 2300 aa hlatnak tikam ah Thai cozah in tilei chanchuahtu bu nih hmun zong an khuar cang.
July 2 ni khan mah ngakchia minung 13 cu British ram in tilio thiam minung pahnih Rick Stanton le John Volanthen nih a hmasabik an va hmuh hna. Ni 9 leng rawl lo in an um i an lakah minung pakhat lawng hliamhma pu in a um. Sii-ai lei zong in an thlop kho cang i an caah a herhmi eidin pawl zong an chanh khawh cang hna. Lungkua chung i aa taapmi ngakchia hna cu an zapi himdam in an hmuh cang ko hna nain a leng chuah khawnnak ding ah caan lak deuh rih a hau lai tiah Thai cozah nih cun an ruahdamh.
US ram in a ra vemi lungkua lei thiamsang pakhat Anmar Mirza nih cun mah ngakchia hna a leng chuah nakding hi harnak a um rih tiah a chim.
“Lungkua luhnak lam le a fa ngai. Cun, lungkua chung hmun tampi ah ti le a tam manh cang fawn. Tilio pi ding ti ah le Oxygen bu he ti lio ding a si tikah ngakchia ca cun tih a nung. Ruah le a dai lo, ti nih le a lian lengmang. Zeitik lak khawh an si lai ti hi chim a har ngai ko. Lak khawh an si hlan chung paoh cu Thai cozah nih ngakchia eidin pawl chanh peng khawh hi a biapi ko.”
Lungkua chungah a taangmi ngakchia hna an umnak tiang hi chanchuaktu bu hna nih cun electric mei van khawh ding zong an timhlamh. Ngakchia pawl cu hmuh an si cang ko nain chanhchuah khawh bel an si rih lo. Khuati zohthiam hna nih le ruah a sur i ti zong mah nakin a thang kho rih ti an chim tikah a taangmi ngakchia chungkhar le vawleicung mi hna cu lungdai lo in hngah cuahmah a si.
Ref; VOA
