Lungkua Chungin Chanchuahtu Ding A Rak Hngaktu Thailand Ngakchia Hna
TCP-Online| 2018 July 3| Thailand ram Mesain khua pawng lungkua pakhat ah chuak kho ti loin chanchuahtu ding a rak hngaktu Thailand Football Team ngakchia 12 le an saya pakhat cu tilio thiam mi hna nih an hmuh khawh cang hna nain kan chuah kho rih hna lo tiah Chinyian pengkomh lutlai nih a chim.
Ti nih a kulhmi lungkua chung in Thailand Football team ngakchia hna cu pumpululh an chuihnak angkii he ruahlopi in England ram i tilio thiam mi he an hmanthlak cu Thailand cozah nih Video ah an vun langhter.
Atu ah, ni 10 chung lungkua chung rak ummi ngakchia hna cu zeitin lengah kan chuah hna lai ti khua an khang cuahmah lio. Mah ngakchia hna cu a luancia June 23 ni khan an tlau cang i atu ah cun nihra a tling. Lungkua an rak luh ah hin tha tein an rak lut kho ko nain chuah than an timh ah ti a lian manh i an luhnak in cun an rak chuak kho ti lo. Cuticun, ni 10 chung mui dipdep ah rawl lo in khua an sa hna.
A hmuchuaktu tilio thiam nih an chimning ahcun “kan hmuhka hin an rak tap dih. Nain, tha tein kan chawnh kan hnemh hna i lung nuam ngai in an um”. Hi ngakchia hna cu tilionak angki hrukter i chuahpi dingah tilio a thiam lomi lawngte an si tikah an chuahpi ngam rih hna lo. Cucaah, a chuah nakding ti lian tu hi reuter in chuahpi an timh cuahmah lio a si.
Ngakhcia hringtu an nu le nih cun, kan fa le an himdam ding hi 50% lawng zumhnak kan rak ngeih. Atu an van hmuh tik hna ah hin kan lung aa lawm tuk, tiah an chim. A tlaumi Thailand ngakchia chanchuahtu dingah hin minung 1000 leng an pok hna i a ram in cun; Tuluk, Kawlram, Australia, US le British ram tilio thiam an si.
Lungkua chung ah a tlaumi ngakchia hna cu thlali chung an herhmi eidin le sii-ai kan pekchanh hna lai. Lungkua chung in kan chanhchuah khawh hna cangka sii-inn ah thlopbulnak le zohkhenhnak felfaite in kan tuah colh hna lai tiah Thailand ralkap lutlai nih a chim. A tlaumi ngakchia 12 hi kum 11 in 16 kar an si, an sayapa pa hi kum 25 a si.
Ref; BBC
