Lungmili Tisor Pawngkam Hnawm A Chartu Rap Hlasa Paling Thangthat A Tong

Salai Elvis|2019 May 6| Saisihchuak lam, Thantlang in khaan 23 tluk aa hlatnak min ngei pakhat a si mi Lungmili tisor pawngkam hmunhnawm pawl cu Rap hlasak thiam a si mi Paling nih 2019 May 5 ni ah amah pumpak in thianhhlimhnak a tuah tiah kan theih.

Hi thianhhlimhnak a tuah lio hmanthlak pawl cu amah pumpak Account ah a tar langh tikah mi cheukhat nih an conglaawmh i thangthat a tong ngaingai. Hmunhnawm a charmi cu Cian-cawng Plastic pahnih khat a si.

“Lungmili pawngkam hmunthur ka hmuh tikah ka siarem lo ngai i ka hei char i a si ko lo ma! Hi chungah Plastic hmunhnawm a tambik. A hlonhnak cu a um lo nain kan i dinhnak inn kam teah a tom tein ka tun tak” tiah Paling nih TCP ah a chim.

“Keimah zong hmunthur cu ka hlonh lengmang ve tawn. Tiva le ramlak kan kal zongah kan i eidin mi a rawk kho lo mi pawl kan i ken tik zongah kan umnak hmun ah chiatak lo in, a ken hmanh kan huam ko a si ah cun kan ei din hnu ah cun a zaangchin chin cangmi a si ko caah Plastic chung ah chiah than i khuachung lei kan luh pi khawh lo hmanh ah hmun pakhat khat ah a tom tein hei chiah tak khi ka uar deuh. Nawi kung kan kal caan zongah kan hmunthur kha inn tiang kan tin pi ko i hmunthur bawm ah ka hei chiah ko” tiah Paling nih a chimchih.

“Atu bantuk in Lungmili pawngkam hmunthur pawl Paling nih a char lio hmanthlak a mah pumpak Account ah kan hmuh ve. Keimah pumpak hrim kaa lawmtuk, i cawnawk tlak thil tha taktak zong a si. Lungmili pawngkam khua a um mi kan mah pawl hman nih kan tuah khawh lo mi a tuah awk hmanh kan theih lo mi a si. Mino pawl nun a kan chimh caah a cungah kan i lawmtuk” tiah Hriangkhan Seino Association Vice President nih TCP ah a chim.

Lungmili Tisor cu Hmunlipi le Hriangkhan khua hna an ramri ah a luangmi La-aw ah a um mi a si. Lungmili cu a nu le a pa tiin a um i a chak lei deuh hei kai ah Ralte kua timi Lungkua zong a um, Lungmili tisor cu thal caan ah khualtlawng mi le a zoh tu thlakhat ah minung 50 in 100 kar an phan lai tiah pawgkam khua mi pakhat nih ruahdamh tawk a chim.