Macau- Chin Miphun Ni Ah David Lai Hla A Sa Lai
David Lai/TCP
Tawk Tling Thang| 2019 February 11| Tuluk, Macau ah tuah dingmi Chin Miphun Ni ah caanhmang ding in hlasak thiam David Lai an sawm tiah kan theih.
Hi kong he pehtlai in hlasak thiam David Lai nih, “Tukum Chin Miphun Ni cu Tuluk ram, Macau ah caan ka hmang lai. Kan unau Falam Community nih hlasa ding in a kan sawm. Chin Miphun Ni hi February 17 ah tuahding a si caah February 15 khi Kawlram in kaa thawh cang lai. Midang an sawmmi hna cu ka hngal lo, keimah lawng si dawh ka si ko” tiah The Chinland Post ah a chim.
Macau ahhin hlawhfa in Chinmi tampi an phan. Chinmi lawng si lo in Kawl miphun zong tampi an phan. A bik in pa nakin nu a phan mi an tam deuh tiah kan theih.
David Lai cu “ခ်စ္ေနေသာ္လည္း” timi hlaphel zong aa chuah cang. Ramleng Chin zatlang bu hna zong nih voi tampi hlasak an sawm bal cangmi le a sa cangmi a si tiah kan theih.
David Lai hi Kawlram pumpi hlasak zuamnak a simi “Eain-Meet-Sonya” ah pakhtnak laksawng (winner) a rak cotu a si. Amah hi Chin ramkulh Matupi ah 1994 December 12 ah a chuak. A chuahka in Tedim ah an i thial i kum 5 a si tiang a um. Mah hnu ah Tedim in Yangon ah an i thial. 2013-2015 tiang India ram Shilong ah Science Stream in tang 11 le taang 12 a rak kai tiah theih a si.
About The Author
