Magway ramṭhen Ngape peng ah Asho Chin nu pahnih an thah hna
The Chinland Post | 2022 October 11 – Magway ramṭhen, Ngape peng, Bungbaw khua ah a ummi Asho Chin nu pahnih cu nithum chung an tlau hnu October 9 ah an thahnak hna i ruak in an hmuh hna tiah theih a si.
Thah a tongmi hna pahnih hi kum 14 Mai Naung Pa Hla le kum 21 Mai Shwe Zin Ye @ Ma Khin Win hna an si i October 6 ah Koukgyi khua in Bungbaw khua an kirnak lam ah an tlau i October 9 ah an ruak in Maylat khua leng ah an hmuh hna tiah an chungkhat pawl nih an chim.
“Oct 6 ah an tlau, khua pawl fonh in an kawl hna tikah Oct 9 ah Maylat khua leng ah an hma he an hmuh hna, atu cu an vui cang hna, zeiruang dah an tlau timi zong an thei lo” tiah an chungkhat nih Khonumthung Burmese ah an chim.
Mai Shwe Zin Ye cu khuchung ah hngakchia pawl ca a chim mi siangcachim pakhat a si i Ngape peng ah Asho Chin pawl an umnak khua 10 leng a um tiah theih a si.
Ruak an hmuhnak Maylat khua ah SAC ralkap brigade 88 nih hmunhma an khuar tawn i Kuakgyi khua zong ah palek sakhaan pakhat a um leng ah a pawngkam khua zong ah SAC ralkap pawl cawlcanghnak an tuah i atu an thihnak kong he pehtlai in zeihmanh a fiang in theih a si rih lo.
About The Author
