Magway Ramthen Saw Khua Chin Khrihfa Ruak Vuinak Ah Khuami Hna Nih Lam An Kham Piak
CHRO
TCP-Online| 2018 September 3| August 29 ni ah Magway ramthen Saw khua ah Chin khrihfa pakhat a ruak vui dingin thlan lei an panh lioah khuami hna nih lam an kham piak caah tiva tan bu le har ngai buin ruak cu thlan lei . an kalpi ti kan theih.
Saw khua Thirih sang ah Chin khrihfa pakhat a thi i a ruak vui dingin thlan lei an kal ah khuachung hlei in Thirih khuabawi nih kal kho lo ding a phih piak hna caah tanglei lam ah tiva tan bu le har ngai in miruak cu thlan lei ah an kalpi tiah khuami hna nih an chim.
“Ruak vui dingin hin pakhatnak ah khuabawi sinah kan lak. Sizung zong kan hal i Sipin sin tiang zongah kan hal hna. Khuabawi nih a kan pek, siizung zong nih a kan pek i hnubik Sipin sin kan ka tikah, ruak cu vawlei ah phum lo in mei ah duah dingin an kan ti. Cuti mei in duah a si ahcun a herhmi thil dangdang zong kan in bawmh hna lai an kan ti. Vawlei phum ding cun mah ka lei hin hmun a um ti lo nain khatlei ral ah cun a um ko lai nain, mi a bu in khuachung ah ruak phurh le, hlei zawh pawl he khan a si lai tikah Baddish biaknak he aa ral caah lam dang tu zul dingin a kan chim. Cu dih cun, khuabawi sin ah kan kal than i khuabawi nih cun khuami hna duh ning te khan tuah ko ulaw an kan ti. Tahchunnak ah keimah nih in senh hmanh hna sehlaw hnuah buainak a um cun keimah hrangah a that ve lo caah kanmah zong nih a ruak cu har le fe tein tiva kan tanpi i khatlei ral thlanmual cun kan va vui khawh. Chun sml.2 ah vui ding kan timi cu zanlei 5 hnu ceo lawngah kan vui khawh ve” tiah ruak vui vemi khuami pakhat nih a chim.
Thirih sang khuabawi U Ngi Ngei Ngunt nih cun “Ruak vui kongah hin phun dangpi in ka ruat lo. Nain, hnuah khuami cheukhat nih keimah cungah duhlonak hna langhter sehlaw zeihmanh kan tuah kho hlei lai lo, kan khua in mi cheukhat cu Kanpalet peng in a ummi an si tikah an ruak cu Kanpalet zongah an phurh tawn. Nain, hnu ah Kanpalet tiang ruak phurh peng zong hi a si khawh deuh lo caah tubantuk in har le fe in ruak vui a si tawn” tiah a chim.
Khuachung in kal ahcun meng khat hrawng lawng a simi kha hlei zawh sian lo caah tang lam in lo hna pah chih a si caah meng 2 hrawng rau in kal a si tawn.
Magway ramthen Saw khua ah hin Chinmi inn 480 leng an um i khrihfa biami hi inn 60 hrawng in minung 250 leng an si. Khuami hna a tam u cu Buddish biaknak a biami an si tikah mi tlawm u nih biakmi Khrihfa hna cu tubantuk in ruak vui lawng si lo in a dangdang lei zongah harnak an ngei pah lengmang ti thawng kan theih.
Ref; CHRO
About The Author
