Mah Thazaang Tein Tuahmi Mucu Sianginn 11 Ah Sing 350,000 Cio Bawmhnak An Pek Hna

Salai Elvis| 2018 July 28| Thantlang peng chungah mah thazaang tein tuahmi (ko-aa-ko-ko) mucu sianginn 11 hna cu lu-hmuh vuanthan zunglei nih mucu sianginn pakhat 350,000 cio July 27 ni ah bawmhnak an pek hna tiah theih a si.

Mah mucu sianginn 11 bawmhnak an pekmi hna khua cu; Thantlang, Hlamphei, Zephai (A), Fanthen (Blessing), Sentung, Esther mucu sianginn, Zabung, Lungcawipi, Leitak, Mualkai le Lailen khua hna ah khuakhat 350,000 cio bawmhnak pek an si.

“Mah thazaang tein mucu sianginn tuahmi hna cu Kawlram chung huapin bawmhnak pek an si. Kum khat caah khuakhat 700,000 cio bawmhnak pek tawn an si nain tutan cu Mini Budget thlaruk ca lawng a si caah 350,000 cio lawng pek chung an si.” tiah tawlrel tu MCC, Daw Ong Ma Swe nih TCP ah a chim.

Tutan khuakhat 350,000 cio bawmhmi cu ngakchia lentecelhnak caah 50,000, mucu sianginn lutlai retheih man minung pakhat ca thlakhat ah 30,000 hmu dingin thlaruk caah 180,000 le cawnpiaktu sayama pakhat ca thlakhat ah 20,000 hmu dingin thlaruk caah 120,000 tiin then phawt an si.

2017-2018 kum Kawlram chungah mah thazaang tein mucu a tuahmi sianginn 987 a um i hi chungin Chin ramkulh ah 34 le Thantlang pengah 11 an um tiah theih a si.+++

Na ruahning rak langhter ve.. (Leave a comment)

%d bloggers like this: