Mahte In Chief Minister Thimnak Le Phunghrampi Kong Daw Aung San Suu Kyi Bialehnak

Tawk Tling Thang| 2019 January 21| January 20 zanlei sang, Hakha Carson Hall le Thantlang Town Hall i zapi he ton biaruahnak ah Myanmar rampi ruahnak petu Daw Aung San Suu Kyi cu phunghrampi remhnak kong le mahte in chief minister thimnak kong biahalnak an tuahmi cu a tanglei bantuk in a leh hna. 

Khuami pakhat nih, 2008 phunghrampi remhnak kong a halmi he pehtlai in Daw Aung San Suu Kyi  nih, “atu cozah nih phunghrampi remh taktak kan duh i remhding zong in timhtuahnak kan ngei ko. Hihi tlawmte cu lungsaute in kan hngak u law nan hna tung ko rih uh. Phunghrampi remhnak rian kan tuahtuan tikah mizapi nih a kapkip in tha kan pe in kan bawm te uh tiah hika hmun in zaangfah kaan nawl hna. Cu pin ah hluttaw palai hna hi mizapi nih mee pek in an thimnak hna a ruang cu mizapi riantuanpiak ding a si i thlakhat ah ks. sing 10 (1,000,000) ngahnak ding ca men ah mee pekmi an si lo” tiah mizapi sin ah a chim.

Thantlang mizapi he ton biaruahnak ah upa pakhat nih, NCA kumthum tlinnak ah Runvennak biaceih bawizik senior General Min Aung Hlaing chimmi ramthen le ramkulh chief minister hna cu anmah le ramthen cio in tam bik teinak a cotu party nih rianpek khawhnak ruahpiak awk an si ti a chimmi cherhchan in ralkap nih an onh tik caan ah cozah nih rianrang te in tuaktaan piak awk a tha lai maw tiah a hal.

Cu he pehtlai in Daw Aung San Suu Kyi nih, “Fianghlangte in ka chim ko ahcun rampi pakhat ahcun anmah le tuanvo le zulhphung timi an ngei cio. Cu ruang ah upadi sernak cu upadi sertu hluttaw he aa pehtlaimi a si. Ralkap he aa pehtlaimi kongkau a si lo. Ramkomh cozah he aa pehtlaimi kongkau zong a si lo. Ataktak ahcun upadi thlennak, upadi pakhat sernak timi cu hluttaw he lawng aa pehtlaimi a si. Cu ruang ah hluttaw he aa pehtlaimi kongkau cu hluttaw in tawlrel le tuahtuan awk a si” tiah a leh.