Mai Rebecca Aung Chinram Aiawh In Miss Tourism World Wide Myanmar Ah Aa Zuam Lai
City Hunter| 2018 July 12| Mai Rebecca Aung cu Golden Beauty Myanmar Organization nih tawlrelmi Miss Tourism World Wide Yangon Division in aa zuam hnu July 10 zan ah Chin ramkulh aiawh in Miss Tourism World Wide Myanmar 2018 grant final ah i zuam kho dingin an thim tiah kan theih.
Min cazin a pemi minung 12 hmanthlak cu Facebook ah an tar i mizapi nih an vote hna hnu July 10 zaan ahkhan Yangon i Exel Hotel ah thimnak an tuah. Cu chung in Chin ngaknu Mai Rebecca Aung cu Chin ramkulh aiawh in i zuam dingah an thim.
Hi kong he pehtlai in Mai Rebecca Aung nih atu bantuk in The Chinland Post ah a chim.
“July 10 zan ahkhan Miss Tourism World Wide Yangon Division in minung 12 kan i zuam. Hi chung in minung 6 cu ramkulh le ramthen aiawh in Miss Tourism World Wide Myanmar 2018 grant final caah thim kan si. Kei hi zei ramkulh aiawh in dah naa zuam lai tiah a kan hal i Chin miphun ka si caah Chin ramkulh aiawh in zuam ka duh ka ti hna. Cucaah, Chin ramkulh aiawh in Miss Tourism World Wide Myanmar 2018 grant final ah kaa zuam lai. Zeitik dah zuam caan a si te lai timi a kan thanh rih lo caah aa fiang rih lo. Grant final ahcun Kawlram chung ramkulh le ramthen 16 in minung 16 kan i zuam te lai” tiah The Chinland Post ah a chim.
“Grant final tiang phan kho ding in nan kan dirhkamh caah kaa lawm, fakpi in kaa zuam rih lai. Chin miphun nih zohthlami si ka duh. Chin miphun a cawisang khotu pakhat si khawh kaa zuam lai. Chinram le Chin miphun thanchonak caah a kapkip in bawmchan khotu si khawh kaa zuam lai. Cucaah, Chin mizapi nih pehzulh in a dongh tiang nan thapeknak ka herh” tiah a biapeh ah a chimchap.
Miss Tourism World Wide Myanmar 2018 winner cu Myanmar ram aiawh in Indonesia ram ah Miss Tourism World Wide 2018 crown la dingin an i zuam te lai.
Mai Rebecca Aung (kum 19) hi Pu Khin Aung le Pi Shwe Ta Lin fanu, Mara (Chin) a si. Shan ramkulh ah a chuak nain atu cu Yangon ah khua an sa cang. Yangon ah Zoology major in kum 1nk University a kai lio le Bible lei ah B.Th kum 2nk a kai lio a si.
Grant final an i zuam nicaan aa fian tikah vote pekning kong kan thanh than te lai.
About The Author
