Malaysia ah phungning loin luh aa timmi Myanmar raammi 21 Thai ah tlaih an tong

The Chinland Post | 2022 April 14 – Malaysia ram ah phungning loin luh aa timmi Myanmar rami 21 cu April 12 Thai-Malaysia ramri, Songkhala district ah Thai palik nih an tlaih hna tiah theih a si.

Tulio can ah, Malaysia ram ah phungning loin luh aa timmi Myanmar ram riantuantu cu a tu le tu tlaih an ton caah Thai palik pawl nih kawl titoih puai lio cun security an rengh deuh. Cucaah, Myanmar rammi hna nih phungning loin luh i timh loding ah Thai ram ah hrambunh a simi Foundation of Education and Development (FED) rianngeitu U Min Oo nih a chim.

“A hlannak in tlaihkhih a tam deuh. A voi zong a tam. Kawl titoih lio a si caah zohfelnak zong an tuah deuh lai. Tlaihkhihnk zong a tam deuh lai. Cucaah, a si khawh ahcun, phunhning loin luh cu tangka zong a dih, minung zong nan rethei, an in tlaih hna ahcun harnak zong nan tong chin”.

Phungin loin a lutmi hna nih an Broker kha That baht 40,000 an pek i Malaysia ram an phak khawh ahcun Baht 20,000 an pek chap lai.

Mawtaw a mawngmi hna zong Thai rami, Prakyut Creek district in Malay ramri tiang kalding ah Baht 10,000 an pek hna i an ratpimi hna hi a si tiah April 13 ah chuah a simi Bangkok Post ah an langhter.

A tu an tlaihmi hna hi Yangon, Myawaddy, Mawlamyine lei in a raami an si. Phungning loin an rak luh caah, a ziizut an si lai i ram chung in chuahnak (Deportation) zong tuah chih an si lai tiah Bangkok Post nih a langhter.

A luancia April 6 zongah an Broker kha Baht 56,000 pek in, phungning loin a rak lutmi Myanmar ram riantuantu 40 cu Thai-Malaysia ramri Sungkhala district, Sdao peng rubber dum pakhat ah Thai palik nih an rak tlaih hna.

Ref: RFA