July 24, 2024

Malaysia Ah UNHCR Card Deu A Tuahtu Kawl Miphun An Tlaih Hna

0

The Chinland Post | 2024 July 4 — UNHCR card deu (fake) a serchuahtu Kawl miphun minung 5 an tlaih hna tiah Malaysia nawlngeitu lei chim mi cherhchan in Malaysia um Chin miphun minung pakhat nih a Facebook cahmai ah a tar.

An tlaih mi hna hi kum 26 in 49 karlak nu pakhat le pa panga an si i a luancia kum 5- 6 lio in atu bantuk Card deu an rak tuah cang tiah a ṭial fawn.

UNHCR Card deu a tuahtu hna cu Malaysia ram, Johor State, Klung khua ah an tlaih hna hi a si i anmah pawl cu Johor Immigration nih ni 2 chung ṭha tein an ngiat hna hnu ah an tlaih hna hi a si tiah cu Malaysia um Chin miphun minung pakhat nih cun The Chinland Post ah a chim.

Cun Card pakhat ah 5000RM an laak hna. An serhpiak mi hna hi ramdang Rohingya miphun an si tiah theih a si.

Hi card deu a serchuahtu hi Arakan Refugee Relief Committee an si i UNHCR logo zong an hman tiah a langhter fawn.

Malaysia cu phaisa duh ah atu bantuk thil tuah le hlenthawinak hi a tam ngai caah kan nih Chin mi zong kan i ralrin ngaingai a hau. Mah hlan zong ah UNHCR card deu hi an rak tlaih lengmang cang. Hi bantuk ruangah Malaysia cozah le UNHCR karlak zong ah i hmuhthiam lo nak a chuak lengmang tiah a langhter fawn.

UNHCR card deu a rak tamtuk ruangah le UN card aa tlaih mi nih thil thalo an rak tuah lengmang caah kum 2017 lio ah Malaysia cozah nih TRIS (Tracking Refugee Information System) timi tlangtar in nawl an rak chuah. Mah cu MyRC card tiah zong auh a si. Ralzaam a si mi UN card a ngei mi poh nih rak tuah ding mi a rak si. Mah MyRC card cu RM. 500 rak pek ve asi. Nain 2018 ah Cozah an i thlen caah an pehzulh thai lo tiah a chim.

“Card deu le a tak hiti zoh sawhsawh nak cun thleidan a har ngai, sihmanhsehlaw Card a dik mi cu a hnulei mah mah sining kong ṭha tein a langhter mi Scan nak a um i a deu ahcun cubantuk cu a um lo, cubantuk Scan tuah khawh nak cu 2017 hlan cun a rak um rih lo caah a deu a rak tam ngai” tiah Malaysia um Chin pakhat nih cun The Chinland Post ah a chim.

Cun kum 2023 January thla lio ah Kuala Lumpur Imbi sang ah Operasi an rak luh lio zong ah Matu Social Organization nih UNHCR logo hmang in MSO card an tuah mi an rak hmuh hna caah buaibainak a rak chuak bal cang tiah theih a si.

A phan tharmi ca ko ahhin ralrin a herh. UNHCR kong ah siseh rian kong ah siseh mi chimmi poh kha fawi tein zumh le tuah kha kan i ralrin ngai a hau tiah Malaysia um Laimi pakhat nih cun a Facebook cahmai ah a tar.

About The Author

Na ruahning rak langhter ve.. (Leave a comment)