Malaysia Chin Ralzaam Pawl I Dornak Nawl Chin Zatlang Bu Hna Nih UNHCR Sin Ah An Chim
TCP-Hakha| 2018 November 25| Malaysia ram um, Chin ralzaam pawl cu ralzaam sinak donghter ding in UNHCR zungpi nih an timhmi hi an hlawt than awk a si tiah Chin zatlang mibu hna nih Myanmar hrambunh UNHCR tuanvo ngeitu hna sin ah an chuahpi.
November 24 ah UNHCR tuanvo ngeitu hna le Yangon hrambunh Chin miphun tengnge hruaitu hna cu Yangon hrambunh UNHCR zung ah suimilam pathum chung ton biaruahnak an ngei.
Chin miphun ralzaam hna he pehtlai in ralzaam sinak in i dornak nawl donghter dingmi kapkhat lei lawng riantuannak hi a kapkip in an tuaktaan i an hlawt than awk a si tiah ton biaruahnak an ngeih chung ah CHRO le Chin ralzaam bawmchantu committee (CRSC) nih an chuahpi tiah CRSC Secretary chungtel Chan Lian nih a chim.
Cu pin ah ramkip runvennak a herh tukmi Malaysia ram um Chin ralzaam le i dornak nawl a haltu hna limhang, thinlung le lenglei humhimnak pawl zohpiak in nuhrin covo le minung zawnruahnak tahfung he pehzulh in runvennak tuahpiak an herh tiah forhfialnak bia a chimchih.
Malaysia ram ah i dornak nawlngei Kawlram ram in Chin miphun hna hi ramkip runven piaknak a herh ti lo caah ralzaam sinak in i dornak donghter dingmi rian cu 2018 August 1 in an thawk kong UNHCR zung nih June thla in khan thawngthanhnak an tuah.
Myanmar ram cheukhat ah daihnak a um ko nain Chin ramkulh atu lio dirhmun cu a dai cang i ralzaam pakhat cung ah runvenpiak naklei in zoh tikah a him cangmi dirhmun a si caah Chin miphun hna cu Myanmar ram cozah runvennak tang ah lungdai hnangamte in a um kho cang lai ti an ruahnak kong UNHCR nih an langhter.
“Hi tonbiaruahnak kan ngeihnak cu Chin ralzaam kong he pehtlai in kan hmuhning pawl Yangon hrambunh UNHCR zung nih ton biaruah ding in a kan sawm caah a si. Official si lo in zalongte in ton biaruahnak dirhmun in khin kan i tong. Myanmar ram ah hram a bunhmi UNHCR zong nih biakhiahnak nawl an ngei lo. Cu ruang ah anmah zong nih an chim. Nihin ton biaruahnak pawl cu kan ruahnak kan i cheuhbauh a si. Myanmar ram in Chin hruaitu hna lungput laak le hngalh ruah ah khin a si” tiah Chan Lian nih a chim.
Chin miphun cu a dangte hlei in UNHCR nih cathanh an chuahhnawhmi ruang ah Malaysia ram um Chin ralzaam hna tampi a lauter hna i nu ngakchia pakhat tel in Chin ralzaam cheukhat anmahte in i thahnak tiang a chuak ti theih a si caah Malaysia um Chin miphun ralzaam he pehtlai in tampi thinphan awk a sinak kong Chin ralzaam hna bawmchantu committee nih October thla ah cathanh an chuah.
Malaysia ah i dornak nawl a haltu Chin miphun hi 30,000 renglo an si tiah Chin zatlang bu hna nih an chim.
Ref: 7Day News
About The Author
