Malaysia cozah nih ralzaam card ka chuahpiak hna lai tiah a chim, Chinmi ralzaam 40,000 leng an um

The Chinland Post | 2022 April 30 – Malaysia cozah nih an mah he an i pehtlaihnak Agency sin in ram chungah a ummi ralzaam pawl theihpinak card chuahpiak ding in a timhtuah lio a si tiah Malaysia Minister of Home Affair Hamzah Zainuddin nih April 30 ah a chim.

Malaysia nawlngeitu pawl nih zeibantuk ralzaam poah ramchung an um khawh le khawh lo cu biakhiahnak nawl a ngei lai i cozah Agency tawlrelnak in ralzaam card pawl chuahpiak an si lai tiah a rak chim.

“Kan ram chungah ID card a tuahmi a dang Agency pawl zong an um” tiah Putrajaya ah tuahmi Press Conference ah a chim.

Malaysia cozah nih a ram chung a ummi ralzaam pawl theihpinak card chuah a timhmi he pehtlai in “ Malaysia cozah nih ralzaam cohlan ding in min a thu lo. Asinain a ram chungah a ummi ralzaam pawl cazin kha theih a duh. Cun, ralzam pawl pakhat cio an kong zong theih a duh caah UN  a halnak a sau tuk cang. UN nih cu bantuk cazin pawl pek khawhnak nawl kan ngei lo tiah a chim. Cozah nih ralzaam pawl ka chanh hna lai a timi hi ralzaam cazin le thil sning theih a duh caah a si lai” tiah UN card a ngeimi Chinmi pakhat nih a chim.

“A tubantuk in Malaysia cozah nih ralzaam card a chuahpiakmi hna cungah kan thin a phanmi pakhat a um. Malaysia cozah nih ralzaam le dornak nawl a halmi tiah a ṭhen hna cun UN card a ngei rih lomi caah thinphang a si. Cucaah, 2019 in Malaysia ram ah dornak nawl a halmi hna a rannak in ID card tuahpiak ding in kan hal lio a si” tiah a chim.

Malaysia ram ah Chinmi ralzaam 40,000 deng an um i 20,000 hrawng nih UN card an ngeih i a tangmi cu dornak card lawng a ngei rih mi an si caah UN nih phungning tein theihpinak a ngei lo tiah theih a si.

Na ruahning rak langhter ve.. (Leave a comment)

%d bloggers like this: