Malaysia In A Tlung Mi Hakha Nu Telh In Minung 6 COVID-19 Zawtnak Hrik An Ngei Lo Tiah Ngandamnak Zung Nih Thawngthanhnak A Tuah

TCP-Thantlang|2020 March 8| March 6 zinglei suimilam 10:15 ah Malaysia Kuala Lumpur in Kawlram a rak tlung mi Hakha nu pakhat (kum 30) cu a tu lio zawtnak he aa pehtlai kho tiah Way-ba-ki siizung ah chiah in a zawtnak ngiatthlai a si. A mah telh in ngiatthlai mi hna minung 6 cu COVID-19 zawtnak hrik an ngei lo tiah March 8 zan suimilam 8:00 ah ngandamnak zung nih thawngthanh nak a tuah.

COVID-19 zawtnak hrik an ngeih le ngeih lo tiin ngiatthlai mi hna cu ah Way-ba-ki siizung ah chiah mi Hakha nu kum (30), Magway ramthen ah kum (41) pa, Pago ramthen ah kum (37) pa, Sagaing ramthen ah um i Mandalay Kan-tawnady siizung ah chiah mi kum (35)pa, Madalay ramthen ah kum (71)pa le Way-ba-ki siizung ah ngiatthlai mi kum (30)pa hna cu Chekhlatnak tuah hnu ah COVID-19 zawtnak hrik an ngei lo tiah thawngthanhnak an tuah.

Malaysia in a rak tlungmi Lai nu hi Yangon vanlawng bual ah zawtnak kongkau chekhlatnak a tuah tu hna nih a zawtnak an hmuhchuah ning cu; a tak linh tuk ruang, cumpit tlangrai phun in a um ruang le a tha dih phun in a um caah a tulio zawtnak he aa pehtlai kho tiah a dang te zohkhenhnak a si mi Way-ba-ki siizung ah an rak chiah.

March 8 zanlei hnu cazin ning in Kawlram chung ah COVID-19 zawtnak a ngei kho tiah ngiatthlai mi minung 72 a si i cu chungah zawtnak an ngei kho tiah lunghrinh mi minung 2 an um tiah theih a si. (Ref:Ministry of Health and Sports Myanmar)