Malaysia Lai Paih An Leet; Chan Ceu Hlei Thang Nih Minung 30 Bakte A Tengh Hna
TCP-Hakha| 2019 February 6| February 5, Malaysia ah tuahmi Chin Miphun Ni- zatlang paih zuamnak ah Chan Ceu Hlei Thang nih minung 30 bakte a tengh hna. Nihin February 6 hi zuamcawh paih tuah than rih ding an si nain February 5 zan Bualco lai te i khuaci mui in buainak a chuakmi ruang ah tukum chung paih tuah ti lo ding in an leet tiah kan theih.
“February 5, Malaysia ah tuahmi zatlang paih zuamnak ah hin khuaruahhar in Chan Ceu Hlei Thang nih minung 30 bakte a tengh hna. Ka palh lo ahcun chanthar paih zuamna ah a tambik tengtu le tuanbia thar tialtu a si hrimhrim ko lai. Minung 30 leng a tei khotu ka hngal rih hna lo. Chan Ceu Hlei Thang hi Hniarlawn khuami Pu Run Kam (tleicia) le Pi Far Ca fapa a si. 2010 ah Malaysia an phan. Amah hi kum 26 lawng a si rih, nupi a ngei cang i fanu pakhat te zong a ngei cang” tiah Malaysia ummi Thangte nih The Chinland Post ah a chim.
Chan Ceu Hlei Thang hi 2019 Malaysia Chin Miphun Ni paih zuamnak ah minung tambik teitu laksawng RM 500 le Paih dawh bik laksawng RM 300 pin ah a lenglei in laksawng RM 1500 a hmu.
Van Ram Awr hi Hakha Khuathar a si. 2018 kum Hakha ah tuahmi Chin Miphun Ni zatlang paih ah minung 15 in tambik a teitu (a tengtu) a si. Cu lawng si lo in 2017 kum, Falam Chin Miphun Ni ah minung 24 in tambik teitu a rak si thiamthiam. 2016 in tukum tiang Kawlram ah paih in minung tambik a teitu a si. Minung 60 renglo a tei/ a tengh cang hna. Asinain, Van Ram Awr hmanh nih voikhat paih ah minung 30 a teng kho rih lo tiah theih a si.
Malaysia Zatlang paih a caan dih lai ah Ngun Ceu Tha le Bawi Hmung an i pai. Bawi Hmung nih a thluk i an tlak hnu ah a leh chap, a leh hnu in tei ah aa cang. Cucu referee nih rel lo ah a chiah caah Hniarlawn an lungtling lo i buai hram an thawk hi a si tiah kan theih.
Ngun Ceu Tha hi 2015 kum Malaysia CND zatlang paih le 2018 kum zatlang paih ah bual a rak cotu a si. Cu bantuk in Bawi Hmung hi nikum zuamcawh paih ah champion cotu a si ve.
“February 6 hi zuamcawh paih tuah than rih ding in timhtuah cia a si nain buainak a chuah ruang ah kan ngol thai cang lai. Tukum chung cu Paih zuamnak kan tuah ti lai lo. A donghnak aa paimi hi Hakha Khuahlun in Ngun Ceu Tha le Hniarlawn in Bawi Hmung (nikum champion) an si. Ahodah teitu a si lai timi le zeitindah laksawng kong tawlrel a si lai timi zong nihin ah paih committee nih kan ceih lai” tiah min langhter a duh lomi Paih Committee chungtel pakhat nih The Chinland Post ah a chim.
“Hniarlawn le Hakha Khuahlun an i paih hlan ah Chuncung le Hniarlawn an i pai. Cuti an i paih lio ah kaphnih in lungtlinlonak an ngei veve cang. Amah inhin buai hram aa thawk cang. Cu hnu ah Hniarlawn in Bawi Hmung le Hakha Khuahlun in Ngun Ceu Tha an van i paih hnu cun buai taktak in buai a si cang” tiah Malaysia um paih a zohtu Thang Te nih The Chinland Post ah a chim.
Ahodah zatlang paih ah bual a co timi aa fiang lo, paih committee nih an fehter kho rih lo. Paih an tuahnak hmun sianginn ngeitu hi Tuluk pawl an si. Buainak a chuakmi ruang ah thutdan 32 an hrawh. Buainak ruang i an i thonghnak le thutdan in an i chehnak ruang ah aa hliammi le thi aa chuahmi zong an um. Thutdan an hrawhmi vialte cu an liamrulh a hau lai tiah theih a si.
“Hiti bantuk in Malaysia ah buainak a chuah lengmang nak hi mizapi hruh le santlaih lo bia lawng a si lo. Hruaitu tha, tlangtlatu tha felfaite in an ngeih lo ruang ah a si. February 5 zan an buainak zong hi zuurit ruang ah a si lo. AA paimi pahnih buainak zong in a si lo. Referee chambau le a biakhiahmi a dik lo ruang le a lenglei in aa paimi khuahnih hna buainak in asi” tiah USA um Chin upa pakhat nih The Chinland Post ah a chim.
Malaysia, Chin miphun puai tuahnak ahhin buainak a chuak lengmang. Tutan lawng hi a si lo, a voi a tam ngai cang. Chin Miphun Ni tuahnak ah siseh, show tuahnak ah siseh, vawleicung Chin mizapi theih le roling in buainak a chuak theu. Cu ruang ah Malaysia ahhin cun hi bantuk puai tuah awk a si ti lo tiah a titu tampi an um tiah theih a si.
About The Author
