Malaysia Motor Tlukrilhnak In Chinmi Pathum An Thi
Salai CungCung|2019 May 21| Thailand ram in Malaysia ram lei ah phungning lo tanglei lam in a lutmi Chinmi minung 14 citmi Motor cu May 19 ah accident an ton caah a hmun ah minung 3 an thi i minung 7 hliamhma an tuar tiah kan theih.
May 19 zing ah Thailand in Malaysia Kualalumpur lei a lutmi Motor cu Ipoh le Batawa karlak Highyway cung mengtung 190\5 zawn ah rangtuk in a mawngh caah mengtung pawng steel thluan pawl an khan mi cu aa pah sual caah motor chung um minung 4 cu Hlei cung in a tanglei Motor lam lei ah a hlawnh hna i a hmun ah minung 3 an thi colh tiah Malaysia ah ummi Khumi Community in U Aik Lun nih a chim.
Cu Motor accident ah aa tel ve mi minung 7 cu fak ngai in an i hliam caah Thai Sii-inn ah an kal pi hna i minung pakhat cu faktuk in aa khon caah thinphang ngai a si. Minung 4 cu chekfel ding ah Malaysia palek nih an umnak ah an hren hna tiah kan theih.
“A thimi chungkhar lei pehtlaihnak kan tuah lio a si. Malaysia ah vui an duh ah cun Malay um Paletwa Khumi Community nih tawlrel ding timhtuahnak an ngei. Asinain tu lio cu chungkhar lei thawngpawng kan hngah lio pi a si” tiah U Aik Lun nih a chim.
Hi Motor a cit mi Chinmi pawl cu Paletwa, Matupi le Tedim peng lei an si i a thi mi hna minung pa 3 cu Paletwa peng Sami khua in an si tiah kan theih.
Hi Motor accident in a thi mi cu Mg Mg Tan kum 27, Mg Suh Mon kum 20, Mg Khant Laih kum 37 an si. Palek nih an tlaih mi hna cu Nay Lin kum 25, Johan kum 15, Mang Mun Thawng kum 17, Kap Pum Thang kum 25 an si tiah kan theih.
Ref: Khonumthung
About The Author
