Malaysia Prime Minister Hlun Nupi Rosmah Mansor An Tlaih
City Hunter| 2018 Tho 4| Malaysia prime minister hlun Najib Razak nupi Rosmah Mansor cu Malaysia ziknawh eihmuarnak dohtu commission phu (Malaysian Anti-Corruption Commission-MACC) nih an tlaih tiah amah Judge hna nih CNA media sin ah October 3 ah an chim.
Prime Minister hlun Najib nupi Mansor cu MACC zungpi ah an tlaih i acozah ngeihmi 1Malaysia Development Berhad (1MDB) chawva ningcanglo hmannak he pehtlai in chekhlatnak a tong. A luancia September 26 zong ah ziknawh eihmuarnak dohtu phu chekhlattu hna nih Mansor biachimmi cu suimilam 13 chung record an laak. 1MDB chawva buainak he pehtlai in biahalmi a lehnak hna a si.
Mansor pasal Najib le a hawikom hna cu May thla chung ah tuahmi thimnak ah khuaruahhar in an sungh caah nawlngeihnak vialte an thlah dih.
Malaysia Prime Minister a hung si thanmi Mahathir Bin Mohamad nih 1MDB in a tlaumi chawva hna cu hmuh than ding in aa zuam i sualnak a ngeitu paoh upadi ning in dantat an si lai tiah a chim.
Prime Minister hlun Najib cu atu tiang chawva le nawlngeihnak ningcanglo hmannak ahmuh he a zapi sualpuhnak phun 32 a tuar cuahmah lio a si.
Prime Minister Mahathir Bin Mohamad hruaimi Malaysia cozah thar nih 1MDB in a tlaumi American dollar billion ringlo chawva hna cu hmuh than ding in an i zuam caah Najib le a nupi Mansor zong atu bantuk in tlaih in chekhlatnak an tuah hna hi a si.
Najib nupi kum 66 a simi Mansor hi manfak kutken bek, lungvar mansung hna he dawr kal le thil cawk a huam ngaimi a si tiah a min a thang ngaingai.
Ref: Duwun
About The Author
