Malaysia um Chin ralzam Kawlram ah kuat an tong
Kawlram a kirmi Illegal Migrants Photo: Malaysia Myanmar Embassy
Editor | 2021 October 27 — Malaysia ah ralzam dirhmun ah i dor in UN a hngak mi Chin miphun chung ah minung 178 cu Kawl ralkap nih uknak a lak hnu in Kawlram ah kuat an tong i an humhimnak le an covo kong ah tihnung le thinphang a si tiah CHRO nih thawngthanhnak cu 26 October ah a tuah.
Kawlram ah kuat than mi minung 178 chung ah minung 28 cu UNHCR card aa tlai mi. ralzam dirhmun in phungning in ca chuahpiak mi an si tiah a langhter.
Kawl ralhrang ralkap nih uknak a lak hnu February in nihin tiang ah Malaysia cozah nih Chin mi minung 359 an tlaih cang hna. Cu an tlaih mi pawl hna cu Kuala Lumpur ah a ummi Kawlram Embassy nih thonginn ah an veh hna i Malaysia thonginn ah hramhram in Kawlram ka kir ko lai timi minsen an thutter hna hnu in atu bantuk in an kuat than hna hi a si tiah CHRO nih a thanh.
“Atu lio Kawlram buai lio le dirhmun ah ralzam kuat than hi cu cohlan awk a tha lo. A hlan ah ralzam khirh mi tamdeuh cu Insein thonginn ah an kuat hna. Atu hramhram in ralkap a luhter ralrap cozah sin ah ralzam khirh cu an caah thinphang dai lo a si. Malaysia cozah nih ralzam khrih thannak kong ah le ralzam kong ah NLD cozah he hnatlaknak an rak ngeihmi vialte a ngol chung a herh,” tiah Salai Za Uk Ling nih a chim.
“Nihin ah Chin miphun in minung 40,000 fai Mizoram ah kan zam. Mindat peng ah ralzam 20,000 fai an um. Ramchung ah minung thong tampi um hmun ngei lo in an zam cuahmah lio a si. Hi dirhmun kan phanh lio ah Chin ralzam khirh than cu aho cozah le minung hmanh nih an tuah awk a si,” tiah Salai Za Uk Ling nih peh in The Chinland Post ah a chim.
Nihin tiang Malaysia ah Chin ralzam aa dor rih mi hi 40,000 fai an si rih lai tiah kan theih.#
About The Author
