Mandalay Zaanglek Sianginn Kai Ding In Hakha Ah Mi Thimnak An Tuah

0

Salai Cung Cung|2019 April 24| Chin ramkulh chung in Mandalay lei zaanglek sianginn kai ding ah April 24 Hakha Vumtumaung ceutual ah Hakha in minung 21 le Thantlang in minung 3 an zapi minung 24  chung in thimnak an tuah hna tiah kan theih.

 Hi thim mi pawl cu an umkalnak le sianginn kainak dihlak cozah lei nih tuanvo an lak hna lai. Mandalay zaanglek sianginn kai ding in thimmi hna cu taang 8, 9, 10 an si i a tam deuh cu taang 8 an si tiah kan theih.

“Chin ramkulh chung in minung rikhiah cu um lo, zaanglek phun 12 chung ah quality a tling mi paoh cu nu he pa he kan thim ko hna lai. April 23 Mindat pengkomh ah minung 18 kan thim hna. Hi bantuk zaanglek sianginn cu kawlram chung ah tampi a um nain kan mah Chin ramkulh cu Mandalay he pehtlainak kan ngei. Hakha zaanglek sianginn cu 2019-2020 dih ding in kan tuah lai i Hakha zong ah kai khawh a site lai. Sianginn hun a si hnu ah kum fatin basic School bantuk in a kal peng cang lai. Hi zaanglek sianginn ah hin zaanglek kong lawng cawn si lo in a dang subject zong cawn chih a si ko lai” tiah Mandalay zaanglek sianginn principal nih The Chinland Post ah a chim.

“Minung thim ning cu pumpululh, tlik, judo, tibantuk adang dang zaangleknak ah thiam hleimi an mah coach nih a zoh hna i nu he pa he aa khat tein an thim hna. Sianginn an va phak tikah umnak le eidin awk adang dang an herh mi zapi cu cozah nih a tawlrelpiak hna lai. Hi sianginn kai lio ah hin thiam hleimi cu ramkip zong ah zuamnak an kal kho” tiah Chin ramkulh zaanglek zung vice-director U Kyaw Kyaw Oo nih The Chinland Post ah a chim.

Hi Mandalay zaanglek sianginn ah kai in degree lak tiang a kai kho mi cu Hakha zaanglek sianginn zong ah riantuan khawh a si lai. Tu Mandalay sianginn ah kai ding in thimmi hna cu Taang 8,9,10 an si. Chin ramkulh chung ah thim mi pawl cu Mandalay zaanglek sianginn an va phan tik ah thim than an si lai i cu ah aa tel lomi cu mah le sianginn kainak ah an kai than kho tiah kan theih.

About The Author

Na ruahning rak langhter ve.. (Leave a comment)

%d bloggers like this: