Mang Hlei Tial; Hlasak Hi Tualleng Ka Kai In Ka Rak Zuam Cang
Salai CungCung|2019 May 17| Avoi 1nak Global Zophei Seminar Idol tuahmi ah Khua ai-awh in minung 32 hrawng an i zuam kho i Congthia in Mang Hlei Tial nih pakhatnak a hmuh. Cu kong he pehtlai in The Chinland Post nih ton biaruahnak kan ngeih i hlasak hi ka ngakchiat tualleng (mucu) ka kai lio tein ka rak zuam cang tiah a chim.
“Tubantuk in pakhatnak ka co cu Pathian thawngin a si. Cun hi tawlreltu sin le thazaang a ka petu mipi cung ah lunglawmhnak tampi ka ngei. Hlasak hi ka ngakchiat te- tualleng (Mucu) ka kai lio tein ka rak zuam cang i biatak tein hlasak hram kaa thawk cu 2019 Zophei Idol in hin a si. Hla hi pumhnak tibantuk le Congthia Idol rak tuahmi ah voikhat ka rak i zuam bal i pahnihnak ka ngah. Hi Idol zuamnak ah hin pakhatnak hmuh ding hrim in timhtuahnak le Pathain sin thlacamnak ka ngei. Cu kaa timh tuahnak le ka thlacaamnak cu Pathian nih a tlam a tlinter hi a si” tiah Zophei Idol winner Mang Hlei Tial nih TCP ah a chim.
“Tutan Idol an tuah cu ka lungtling ngai ko nain hla aa zuammi tu nih hmailei ah cun hla quality tha deuh mi le hlahar deuh hi zuamnak ah cun kan sak khawh ah a tha. Hla zuam tikah a herh ngai tiah ka ruahmi cu pakhatnak ah hla tha tein zah, hla hi mah nih zeitindah midang he i khat lo in ka sak khawh lai, ka hlasak mi nih zeitluk in dah mipi le tlangtlatu thinlung a lak khawh lai, cun zuam hlan ah biatak tein timhtuahnak ngeihbu tein i zuam ding a si. Hmailei Idol tuah tikah cun laksawng zong tam deuh tein le Idol zong pehzulh tein kan tuahpiak kho hna seh ti ka duh. Cu ti tuah khawh ah cun kan Laimi chung in hlasak thiam tampi kan chuak kho lai” tiah a chim chap.
“Tutan pakhatnak ka hmuh hi kei mah ruahnak ah, hlasak umtu zia ka thiam, cun kanmah tein hla hi original bantuk sak lo in tlawmpal te aa dang deuh in ka sak khawh caah ka ngah rua tiin ka ruah. Hmailei ka timhtuahmi cu Chin Idol zong ah i zuam rih ka duh. Cun Album zong i chuah kho ve ning tiah timh tuahnak ka ngei. Keimah duh ning ah tukum chung ah Pathian hla Album pakhat i chuah ka duh. Hla cu Pathin hla he Love song he sak ka timh ko”.
“Hla lei ka duh phun le sak kaa fawihmi cu country lei hi a si. Cun hla a rock deuh mi pawl a sang lei paoh hi ka duh. Ramleng kal cu timhtuahnak ka ngei nain ka kal hlan ah holh hna tha tein cawn hmasa ta ka duh. A tubantuk in hmailei zong ah thazaang rak ka pe peng rih ko u law mipi duh ning tein tampi kaa zuam rih lai”.
Mang Hlei Tial cu a khua Congthia, a nu Pi Tawk Len Sung a pa Pu Lian Hmung, unau pali lakah upabik a si. Atu hi tanghra ka phit dihka te a si. A awn ahcun university ah BBA hi cawn le kai a duh tiah kan theih.
About The Author
