Manipura Electric Mei Rian Ngolmi Thawk Than Ding Timhtuah
Salai CungCung + Salai Josephbawi| 2020 January 15| 2011 ah rak ngol cangmi Chin ramkulh Falam peng chung um Manipura Electric mei tuah than dingin Chin ramkulh le Sagaing Ramthen Cozah le hluttaw rianngeitu pawl le Ramkomh Cozah chonhbiaknak kan ngei cuahmah tiah Chin ramkulh Cozah lei in thawng kan theih.
“ Hi thok khawhnak ding caah January 13 ni ah tuan a duhmi Company, Ramkomh Cozah, Chin ramkulh Cozah le Hluttaw, Sagaing Ramthen Cozah le hluttaw tiin chin nitlak meeting kan ngei. Kan lak than ding a si ahcun zei miaknak le sunghnak dah a um kho timi hi a biapi kan ceihmi cu a si. February thla zongah ton than ding kan itim i cu hnu cu bia a fiang te lai” tiah Chin Ramkulh Sipin Electric lei Vuanci U Seo Thet nih The Chinland Post ah a chim.
“Manipura mei kan chuah khawh ahcun Ramkomh Cozah tawlrelnak lawng in a kalte ding a si. Ramkulh level cu meitha 30MW tang lawng chuahnak nawl kan ngei caah Ramkomh Cozah tawlrelnak tangah a um ding a si, Chin nih zeidah kan miak lai timi cu a um lai lo. Zeitin dah rian kan thawk khawh lai timi hi abiapi in kan ceih hmasami a si ko” tiah a biapeh ah a chim.
Manipura Electric Dam cu 2004 in zohfelnak le riantuannak an thok I 2009 ah 20% deng a dih cang nain Ramchung lei riantlaitu karlak ah eihmuarnak a um caah 2011 ah rak ngolter a si tiah theih a si. Manipura Electric Dam thok than khawhnak ding caah Ramkomh Cozah nih Kawlram Kyats nuai 200 tangka chiah a si cang i Company lei nih riantuannak an thok taktak ahcun US Dollar nuai 805 (Kawlram tangka in 1200billion) leng a dih lai tiah theih a si.
About The Author
