March 23-24 Ah Hakha, Thantlang Le Falam Mei Hmih Timhmi A Ni An Thawn Caah A Mit Rih Lai Lo

Tawk Tling Thang | 2019 March 22| Transformer chap le thlen an timh caah Hakha, Thantlang le Falam cu nihnih chung mei hmih an timhmi a ni an thawn than caah March 23-24 ah mei a mit rih lai lo tiah Chin ramkulh EPC zung in thawng kan theih.

Hi kong he pehtlai in Chin ramkulh EPC zung lutlai U Aye Kyaw nih, “Transfomer a ngan deuhmi chap kan timh caah nihnih chung Hakha, Thantlang le Falam mei a mit te lai. March 23 le 24 ah tuah kan timh nain transformer bunhnak Karin seh a tlamtlin lo caah a ni kan thawn. Cu ruang ah March 23 le 24 hi mei a mit rih lai lo. Thla thih hrawng lawng ah kan tuah khawh te lai” tiah The Chinland Post ah a chim.

“Hakha khuachung um 66/11KV 5×2 MVA Electric mei peknak zung in 5 MVA Transformer cu 10MVA Transformer a thawng deuh mi in thlen kan timh. Zeitik ni ah dah kan thlen lai timi cu a fiang rih lo, thla thih hrawng ah a si te lai. Mah kan thlen tikah cun nihnih chung paoh cu chun he zan he mei a mit dih te lai. A ruang cu a hri vialte phawih dih a hauh te lai caah a si. Amah belte, 5 MVA Transformer hi pahnih a si caah pakhat paoh hi cu a nung lai i mah a nunak mei line paoh cu mei a ra te ko lai” tiah a biapeh ah a chimchih.

Atu thlen an timhmi hi Hakha ma-ha-dat-aa- zungthen line a si. Transformer an hmanmi thazaang a der ruang le a tei ti lo ruang ah a thawng deuhmi in thlen an timh hi a si. Falam le Thantlang hi Hakha ma-ha-dat-aa zungthen line in pek an si caah Hakha a mih ahcun Thantlang le Falam zong a mit chih dih ding a si tiah kan theih.

Na ruahning rak langhter ve.. (Leave a comment)

%d bloggers like this: