မတ်လ ၈ရက်နေ့ညတွင် ချင်းကစားသမားသစ် တီာလ်ထန်း အပါအ၀င် မြန်မာနိုင်ငံသား သုံးယောက် ယှဉ်ပြိုင်မည်
March 8 zan ah aa thua ding Myanmar rammi pathum
The Chinland Post| 2019 March 3| ၂၀၁၉ ခုနှစ် မတ်လ (၈) ရက်နေ့ ရန်ကုန်မြို့ သုဝဏ္ဏအားကစားရုံတွင် ကျင်းပမည့် ဘက်စုံသုံးကိုယ်ခံပညာ ခေါ် MAA ပြိုင်ပွဲတွင် ချင်းကစားသမားသစ် Tial Cung Thang (တီာလ်ထန်း) အပါအ၀င် မြန်မာသား သုံးယောက် ယှဉ်ပြိုင်မည်။
တီာလ်ထန်း သည် MMA ခေါ် ဘက်စုံသုံးကိုယ်ခံပညာပြိုင်ပွဲတွင် ပထမဦးဆုံးအကြိမ် ပါဝင်ယှဉ်ပြိုင် ထိုးသတ်မည့် ချင်းလူမျိူး ကစားသမား ဖြစ်လာမည်ဖြစ်သည်။
အမေရိကန်နိုင်ငံသား ချင်းတိုင်းရင်းသားလက်ဝှေ့သမား တီာလ်ထန်းဟာ မြန်မာပြည်မှာကျင်းပမယ့်ဘက်စုံသုံးကိုယ်ခံပညာ MMAပြိုင်ပွဲယှဉ်ပြိုင်ဖို့အတွက် မတ်လ (၂)ရက်နေ့ မနက်၅နာရီဝန်းကျင်မှာ ရန်ကုန်ကိုရောက်ရှိခဲ့ပြီဖြစ်ပါတယ်။ တီာလ်ထန်းက သူ့ပြိုင်ဖက်ကို ၂ ချီမတိုင်ခင်မှာအနိုင်ယူမယ်လို့ မီဒီယာတွေဆီမှာပြောထားသည်။
“လာမယ့် ၂၀၁၉ ခုနှစ် မတ်လ (၈)ရက်နေ့မှာ ကျွန်တော် အပါဝင် ဖိုးသော်ရယ်, အန်တိုနီယာ တို့က မြန်မာနိုင်ငံ ကိုယ်စားပြု အနေနဲ့ သုဝဏ္ဏ အားကစားကွင်းမှာ ပါဝင်ထိုးသတ်မှာ ဖြစ်ပါတယ်။ ကျွန်တော် မြန်မာပြည်က ပရိသတ် တွေနဲ့ တွေ့ရဖို့လည်း အရမ်းစိတ်လှုပ်ရှား နေပါပြီ။ မြန်မာပရိသတ်တွေ ဂုဏ်ယူစေနိုင်လောက်တဲ့ ရလာဒ်မျိုး ပေါ်ထွက်လာဖို့ ကြိုးစားနေကြတာမို့ အားပေးကြဖို့ မျော်လင့်ပါတယ်” ဟု Tial Cung Thang က ပြောသည်။
One Champion-MMA ပြိုင်ပွဲကို လာမည့် မတ်လ(၈)ရက်နေ့ည ၆း၀၀နာရီ၊ သုဝဏ္ဏအားကစားရုံ၊ ရန်ကုန်မြို့တွင် စတင်ယှဉ်ပြိုင်ထိုးသတ်မည်။ ထိုညတွင် (၁၄)ပွဲ ယှဉ်ပြိုင်ထိုးသတ်မှာဖြစ်ပြီး ပွဲယှဉ် (၃)ခုမြောက်မှာ မြန်မာနိုင်ငံသား ဘိုဇီနာ အန်တိုနီယာ (Bozhena Antoniyar)နှင့် မလေးရှားနိုင်ငံသား Audreylaura Boniface သည် Atomweight level ဖြင့် ၎င်း၊ ပွဲယှဉ် (၈)ခုမြောက်မှာ မြန်မာနိုင်ငံသား တီာလ်ထန်း နှင့် ကမ္ဘောဒီးယားနိုင်ငံသား Rin Saroth သည် Catch weight (68,0KG) level ဖြင့်၎င်း၊ ပွဲယှဉ် (၁၃)ခုမြောက်မှာ မြန်မာနိုင်ငံသား ဖိုးသော်နှင့် အင်ဒိုနီးရှားနိုင်ငံသား Yohan Mulia Legowo သည် Featherweight level ဖြင့် ယှဉ်ပြိုင်ထိုးသတ်မှာဖြစ်ကြောင်း သိရှိရပါသည်။
MMA ကမ္ဘာ့ချန်ပီယံ အောင်လအန်ဆန်းက “တီာလ်ထန်း၊ ဖိုးသော်၊ ဘိုဇီနာ အန်တိုနီယာ သုံးယောက်ပါမယ့် March လပွဲအတွက် ကျွန်တော်အရမ်းစိတ်လှူပ်ရှားနေရတယ်။ သူတို့သုံးယောက်ထဲက ဘယ်သူ့ပွဲကိုအကြည့်ချင်ဆုံးဖြစ်မလဲ” ဟု သူ့ရဲ့ facebook စာမျက်နှာ ရေးသားသည်။
“MMA မှာ ၀င်တာ ကမ္ဘာ့ချန်ပီယံ ဖြစ်လာဖို့ရည်မှန်းထားပါတယ်။ MMA မှာ ကျွန်တော့အနေနဲ့ အနိုင်ရရှိမှု မှတ်တမ်း တစုံတခုမှ ပြောစရာမရှိသေးပါဘူး။ အခုပြင်ဆင်မှုက ကောင်းပါတယ်။ မိသားစုနဲ့ ခွဲပြီး တခြားနေရာမှာ လေ့ကျင့် မှုလုပ်နေပါတယ်။ ကျွန်တော်လေ့ကျင့်ဖော်တွေက တော်တော် တောင့်တဲ့သူတွေဖြစ်တယ်။ သူတို့နဲ့လေ့ကျင့်ရတာ အများကြီး ယုံကြည်စိတ်ချမှုရှိတယ်။ ဘုရားသခင် လမ်းပြမှုကြောင့် ဒီတခါပွဲမှာ အနိုင်ရလိမ့် မယ်လို့ ယုံကြည်တယ်။ ဒီပွဲဟာ ကျွန်တော့အတွက် ပွဲဦးထွက် ပွဲစဉ်ဖြစ်နေတော့ အားလုံး ဆုတောင်းပေးမှု၊ အားပေးမှု လိုချင်တယ်” ဟု Tial Cung Thang က The Chinland Post သတင်းဌာနသို့ ပြောသည်။
တီာလ်ထန်း နှင့် ယဉ်ပြိုင်မည့် ကမ္ဘောဒီးယားနိုင်ငံသား Rin Saroth သည် MMA ပြိုင်ပွဲတွင် ၅ ကြိမ်ယှဉ်ပြိုင်ထိုးသတ်ခဲ့ပြီးသူဖြစ်ရာ ၂ ကြိမ်အနိုင်ယူကာ ၃ ကြိမ်ရှူံးနိမ့်ထားသည်။ Rin Saroth သည် အသက် ၂၅နှစ်၊ အရပ် ၅ပေ၊ ၆လက်မမြင့်ပြီး ကိုယ်အလေးချိန် ၁၄၃ပေါင် ရှိကြောင်း သိရသည်။
တီာလ်ထန်း သည် ၂၀၁၉ ခုနှစ်၊ ဇန်န၀ါရီလ ဒုတိယပတ်တွင် MMA ပြိုင်ပွဲကျင်းပသူ Singapore အခြေစိုက် One Championshipနှင့် နှစ်ဖက်သဘောတူ စာချူပ်လက်မှတ်ရေးထိုးခဲ့ကြောင်း သိရသည်။
တီာလ်ထန်း သည် Bantamweight မှာ ယှဉ်ပြိုင်ထိုးသတ်ပြီးတော့ တနေ့နေ့၊ တချိန်ချိန်တွင် ကမ္ဘာ့ချန်ပီယံဖြစ်လာမည် ဟု ယုံကြည်ကြေင်း MMA ကမ္ဘာ့ချန်ပီယံ အောင်လအန်ဆန်း ကမှတ်ချက်ပေးခဲ့သည်။
Tial Cung Thang သည် ယခုလက်ရှိတွင် အမေရိကန်ပြည်ထောင်စု ဖလော်ရိဒါပြည်နယ်တွင် မိသားစုနှင့်အတူနေထိုင်လျက်ရှိပြီး USA နပန်းပွဲတွင် New York State ချန်ပီယံနှစ်ကြိမ် ရရှိဖူးသည်။
ထို့အပြင် BJJ Brazilian Jujitsu မှာလည်း Blue ခါးပတ်ရရှိဖူးကြောင်း သိရှိရပြီး ချင်း နပန်းပြိုင်ပွဲ (Chin Wrestling ခေါ် Laipaih) တွင်လည်း ၅ကြိမ် ချန်ပီယံ ရရှိသူဖြစ်သည်။
Tial Cung Thang သည် ချင်းပြည်နယ်မြို့တော် ဟားခါးမြို့နေ ဦးသောခ့်ကျဲမ်နှင့် ဒေါ်မန်စီးမှ ၁၉၉၄ ခုနှစ်တွင် မွေးဖွားပြီး၂၀၀၅ခုနှစ်တွင် မလေးရှားနိုင်ငံရောက်ရှိကာ ၂၀၀၇ခုနှစ်တွင် Syracuse, New York, USA သို့ရောက်ရှိကြောင်း သိရသည်။
About The Author
