Matupi Ah Chin Party le Kanpetlet Ah NLD Party Nih Teinak An Hmuh

0

The Chinland Post| 2018 November 4| Matupi peng i Chin ramkulh Hluttaw palai thimnak ah Chin party (CNLD) chungtel Chin League for Democracy (CLD) in aa cuhmi Salai Aung Lian nih mee 5964 in teinak a hmuh cang. Cu bantuk in Kanpetlet peng ah NLD party in U Nyunt Win nih mee 3083 in teinak an hmuh i Chin party pahnih a simi CNDP le CPP cu USDP mee hmuhzat hmanh an hmu kho lo tiah theih a si.

Hi kong he pehtlai in Chin ramkulh thimnak commisstion lutlai U Lin Kyaw nih, “Tutan caankarlak thimnak ahhin Matupi peng in ramkulh hluttaw caah thimnak aa cuhtu hi CLD in Salai Aung Lian le NLD in Pu Aung Thang an si. Matupi cu mee tlamtling te in kan rel dih cang i CLD party in Salai Aung Lian nih mee 5964 in teinak a hmuh. NLD in Pu Aung Thang nih mee 5206 lawng a hmuh. Meezung 70 a um i mee pe khotu zapi hi 17362 an si i hnonpiakmi (invalid vote) mee hi 224 a si” tiah The Chinland Post ah a chim.

“Tutan caankarlak thimnak ah Kanpetlet Pyithu hluttaw mee hmunhma ah mee result cu; aa cuhtu hi party pali; CNDP, CPP, NLD le USDP an si.  Meezung 69 a um i mee thla khotu zapi hi 12449 an si. Mee an hmuhzat cu; U Nyunt Win (NLD) nih mee 3083, U Mana Naing (USDP) nih mee 2527, Salai Kee Thang Lon (CNDP) nih mee 2445 le Salai Mana Shing (CPP) nih mee 242 an hmuh. Cucaah, Kanpetlet ah teinak a cotu cu NLD in U Nyunt Win a si. Atu tiang ah zeihmanh buainak le hnahnawhnak a um lo, thimnak kong ah tazacuainak zong a um lai ti ka zum lo. Tlamtlingte le daite in thimnak kan tuah khawh” tiah a biapeh ah a chimchih.

NLD cozah kai hnu in a luancia caan karlak thimnak ah Chinram in Thantlang peng ah Vice President Henry Van Thio zaka ah thimnak rak tuah a si. Cu lio ah NLD party in aa cuhmi Pu Bawi Khing (Amyotha hluttaw) nih teinak a rak hmuh.

Salai Aung Lian hi 1987 January 21, Matupi peng ah a rak chuak. Atu hi kum 31 a si. 2010 ah University of Pakokko in Civil Engineer (B.Tech) degree a ngah. Mother Industrial Co.,Ltd ah Plant Manager a rak tuan bal. Atu cu Travel and Tour Co.,Ltd ah manager a tuan lio a si.

Chin party 3 a simi CNDP, CLD le CPP cu party pakhat ah CNLD timi party min in an i fonh cang caah Matupi peng i CLD nih teinak a hmuhmi cu CNLD teinak a si. Thimnak commission zung ah CNLD min in register zong an ap cang.

Caankarlak Thimnak ah aa cuh ding min cazin rak pek lio ahhin Chin party 3 an rak i fonh kho rih lo. September thla ceo ah an i fonh khawh caah hmasa min an rak pek ningin an i cuhnak a si. Atu ahcun party pakhat an si cang hna.

About The Author

Na ruahning rak langhter ve.. (Leave a comment)

%d bloggers like this: