Matupi pawng a phanmi SAC mawṭaw thluan cu CDF-Matupi nih an kah, SAC ralkap 5 an thi
The Chinland Post | 2022 April 7 – Mandat khua in a rak chuakmi SAC ralkap mawṭaw thluan 84 cu April 6 ah Matupi khua pawng an phan. April 7 zinglei sml 6:40am hrawng ah CDF-Matupi nih an kah hna caah sml 1 leng kahdohnak a chuak. Cu kahdohnak ahcun SAC ralkap 5 an thi i tampi nih hliamhma an tuar tiah CDF-Matupi nih a thanh.
Mindat khua in a rak chuakmi SAC ralkap mawṭaw thluan hi CDF-Matupi nih April 5 in kah hram an thok cang hna i a tutan zong ah Matupi khua in meng 15 aa hlatnak an phak ah an kah ṭhan hna hi a si.
Matupi ah hram a bunhmi SAC ralkap battalion nih kahdohnak hmunhma pawl le Chanpyan khuahlun lei ah hriamngan in an kah lengmang caah kahdohnak a chuak ṭhan kho men tiah CDF-Matupi sin in thawng theih a si.
Matupi Byu-Ha ah eidin chanding in a kalmi SAC ralkap mawṭaw thluan cu Mindat khua in March 24 ah an i thawh i Mindat ram chungah CDF-Mindat nih a kah lengmang hna caah SAC ralkap 20 leng an rak thi cang.