Matupi Peng Ah CDF-Matupi Nawl Lawng In Luhchuak Khawh A Si Lai Tiah CDF-Matupi Nih Theihternak An Tuah

The Chinland Post | 2023 June 13 — Chin ramkulh, Matupi peng ah SAC ralkap pawl nih mipi thuam in umkalnak an tuah lengmang caah zeibantuk phu hmanh CDF-Matupi nawl lawng in Matupi peng chung ah lutchuah khawh a si lai tiah thawng theih a si.

CDF-Matupi nih phung ning tein (Official) cathanh a chuah mi a um lo nain a luancia June 8 ah CNA/CNF cathanh kha kan cohlan i kan fehter tiah CDF-Matupi biachimnak nawl a ngeitu Salai Naing Kyun Kim nih Ayeyarwaddy Times ah a chim.

“Matupi ca zong ah hman chih a si lai. Atu thawk in rep te le ningcang tein kan tuah cang lai caah CNA/CDF nih cathanh an chuah ning tein zulh ve a si lai. Ahnu bik thawngpang kan theih ning ah SAC ralkap pawl mipi thuam in a thli tein an lutchuak tawn tiah kan theih” tiah CDF-Matupi biachimnak nawl a ngeitu nih a chim.

Matupi peng chung ah khuate lei in khuapi ah a rak kai mi an um tuk lo nain Mawṭaw pawl luhchuahnak nawl CDF-Matupi nih an awnh caah NGO, INGO phu telh in adang phu pawl a lutchuak mi an tam tuk caah atu bantuk in himnak an rengh hi a si tiah theih a si.

CDF-Matupi nih a luancia kum ah Matupi khua luhchuahnak nawl he pehtlai in rii a khiah caah khuami cheukhat harnak an tong ngaingai i an dorh ṭhan tiah theih a si.

“Atu lio hi mipi hna zong nih ralrin ngai kan herh mi cu NGO/INGO phu pawl a lutchuak mi an tam tuk cang. Cucaah cu bantuk phu i lawhter riangmang in a rak lut mi thil tampi a um kho. Mipi ca zong ah ṭihnung a si caah NGO/INGO phu pawl zong kanmah nawl lo in luchuah khawh a si hrimhrim lai lo. CDF-Matupi hmunhma chung ah zeibantuk phu hmanh duh poah in luhchuah khawh a si lai lo” tiah Naing Kyun Kim nih Ayeyarwaddy Times ah a chim.

Matupi hrambunh SAC Tactical Operator (ဗျူဟာမှူး) an thah khawh hnu ah kawl lei in SAC ralkap pawl mipi thuam in tampi an rak lut tiah thawngpang a leng.