Matupi peng chungah raifanh zawtnak a karh, sii zong an har

0

SONY DSC

The Chinland Post | 2022 June 13 – Fur caan aa thok cang i Chin ramkulh, Matupi peng ah raifanh zawtnak a karh i sii zong a dih i thlopnak nawl zong a um lo caah harnak kan tong tiah khuami hna nih an chim.

Tlangsang a tampi nak Matupi peng chungah a luancia May thla dongh thok in raifanh zawtnak a karh i sii lei chanbaunak zong ton a si caah nunnak tiang a ṭhihphaih tiah Matupi khuami 1 nih a chim.

Matupi peng chung a ummi pakhat nih “Kanmah lei hmunhma ah fur caan a phak cun raifanh a tam. Khuate lei cu raifanh in an zaw ngai. Khute hna ah a hlan bantuk in ngandamnak lei saya/mah pawl an um lo. A tulio cu Traditional Healer (ṭai-yin-se-saya) pawl auh a tam” tiah Irrawaddy ah a chim.

Matupi pengah raifanh zawtnak a tam caah hramhram in uknak lak a rak a si hlan cu ngandamnak zung le NGO pawl fonh in ngandamnak lei rianṭuantu rianpeknak in caan saupi tiang a nguhmi sii ciah cia khiangthawng pawl bawmhnak, zawt khamhnak sii hna pek le ngandamnak lei cawnpiaknak pawl zong a tak in rak tuah a si tiah Matupi khuami hna nih an chim.

Hramhram in uknak lak a si ruangah ngandamnak lei rianṭuantu pawl CDM an tuah caah khuate lei ngandamnak zung ah minung i zat lo, SAC nih lam phih, eidin le sii phorh a khap caah Matupi peng chungah ngandamnak lei zohkhenhnak a um ti lomi dirhmun phak a si tiah Matupi peng NGO rianṭuantu nih a chim.

“Matupi peng chungah ngandamnak he pehtlai in rianṭuannak a um ti lo. A tulio nikhua hi raifanh a tam caan a si caah a zual khun. A biapi cu hriamtlai kaphnih nih lam an phih. Cun ngandamnak lei rianṭuantu pawl CDM a tuahmi an tam. CDM a tuah lomi rianṭuantu pawl nih khuate lei an kal ngam lo. CDF pawl an ṭih hna. Ralkap zong nih ngandamnak lei rianṭuantu pawl kha sii pung he khuate lei an kalter hna lo” tiah Irrawaddy ah a chim.

Matupi peng ah raifanh zawtnak a karh i sii a har caah CDF chungtel hna zong raifanh in an zaw tiah CDF-Matupi hruaitu pakhat nih a chim.

“Khuate lei ah raifanh a karh tiah kan theih. Kanmah chungtel hna zong raifanh in an zaw. Raifanh in a zawmi 3/4 hrawng an um lai. An dam rih lo. SAC nih lam a kham. Sii cawk ding in khuapi chungah luh khawh a si lo. Ramri lei zongah sii phorhnak nawl a um lo caah harnak kan tong ngaingai” tiah Irrawaddy ah a chim.

June 4 ah CDF-Matupi chungtel pakhat cu sii a tlamtlin lo caah a nunnak a liam tiah CDF-Matupi nih June 5 ah a thanh.

About The Author

Na ruahning rak langhter ve.. (Leave a comment)

%d bloggers like this: