Matupi peng ni 9 chung kahdohnak ah SAC ralkap 30 nak tlawm lo an thi, CDF- Matupi in pasal ṭha 2 an nunnak a liam
The Chinland Post | 2022 April 9 – Kyaukhtoo in Matupi lei ah ralkap thazang chapding ah a raami SAC ralkap mawṭaw thluan 80 cu 2022 April 7 zaanlei sml 4:30pm hrawng ah Matupi khua an phan.
SAC ralkap pawl nih Mandat-Matupi lam cungah a ummi Ramtin khua cu mei in an khangh i Chanpian khua a pawngkham zong an khangh chap. Mipi ngeihmi sia 8 zong an thah i an ei tiah CDF-Matupi nih a thanh.
March 30 in April 7 tiang ni 9 chung kahdohnak ah SAC ralkap 30 nak tlawm lo an thi. CDF-Matupi in mipi hriamtlai 2 nih ram le miphun caah an nunnak a pek tiah a cathanh ah a telh chih.
SAC nih ralram ah a ummi a ralkap buk pawl caah tiin fur tlak hlan ah eidin le thazang chap aa zuam tiah thawng theih a si.
