Matupi peng Ramtin khua cu SAC ralkap nih mei in an khangh

The Chinland Post | 2022 April 6 – Chin ramkulh, Matupi peng, Ramtin khua mipi inn pawl cu SAC ralkap nih mei in an khangh tiah CDF-Matupi nih thawng an thanh.

Kyawkhtoo in Matupi khua ah thazang chapding in a raami SAC ralkap mawṭaw le cu mawṭaw thluan a dongmi SAC ralkap pawl cu April 6 chun sml 12:00pm thok in Mindat-Matupi lamcung mengtung 84 ah a ummi Ramtin khua cu mei in an khangh i chun sml 1:00pm tiang a kaang thluahmah tiah a langhter.

Ramtin khua mipi hna cu himnak ah lakhruak in an zaam tiah theih a si.

SAC ralkap pawl cu March 30 in April 5 tiang CDF-Matupi nih bom in an puah hnawh hna, an bawh hna ruangah a thimi an tam i an i lungsii lo caah an khanghmi a si lai tiah CDF-Matupi in biachimnak nawl ngeitu nih a ruahdamh.

March 30 in April 5 tiang CDF-Matupi nih kah ruangah SAC ralbawi telh in ralkap 25 an thi tiah an thanh.

“A thimi 25 an si. April 5 bom ka puahmi hna hi cu a thimi kan thei rih hna lo, aa hliammi an tam kho men” tiah CDF-Matupi riangeitu nih a chim.

A tu SAC ralkap mawṭaw thluan hi Matupi khua an phak hlan ah khua 3 tanding a taang rih. SAC ralkap pawl an raa lai timi thawngpang kan theih bak in an thil mansung put in himnak hmun zaamding ah thawng kan thanh hna tiah CDF-Matupi riangeitu pakhat nih a chim.

Na ruahning rak langhter ve.. (Leave a comment)

%d bloggers like this: