Matupi Pengkomh Zung Cu Vawlei Zohthiam Pawl Nih Hmunhma Chekfel Hnu Lawng Ah An Sak Lai

Vahui |2018 August 8|  Chin ramkulh Matupi pengkomh zung saknak hmun thimmi cu vawlei zohtu thiamsang pawl nih vawilei a feh le feh lo an thim dih hnu lawng ah sak a si lai tiah Chin ramkulh Sipin Minister U Soe Htet sin in kan theih.

“Matupi pengkomh zungnak ding hmun cu cheukhat nih Phanang le Ngalang lei sakter an duh. A cheu nih khuahlun lei ah sak siseh ti an duh. Hi pawl cu vawlei zohtu thiamsang pawl nih chekfelnak an tuah lai i vawilei umtu ning, mincim kho ma, zalawng tein sak khawhnak hmun asi ma tibantuk vawilei sining zoh in cozah le mizapi tonbiaruahnak ngeih hnu ah kan sak lai” tiah Chin ramkulh cozah sipin le sehlei minister U Soe Htet nih a chim.

Matupi pengkomh zung sak ding hmun thimnak ah hin Matupi khuami nih cun khua chungah sak hi an duh nain khua chungah hin min a cim tawn caah vawlei zohtu thiamsang pawl chekfelnak result a chuah hnu lawng ah biachahnak tuah a si te lai tiah kan theih.

Hi kong he pehtlai in Matupi khuanu khuapa Chairman Pu Thawng Cin nih hiti hin a chim. “Kanmah duh ning ahcun Matupi khua chungah hin hmunhma zong um ko. Golf Cup lei zong ah hmun chunh ciami um cang. Cuka ah cun zung pa 4 le 5 hrawng sa hna seh ti ka duh. Cun, a dang zung pawl tu hi cu Phanang le Ngalang kar ummi vawilei hmun ah sa hna seh. Cuti an sak ah cun Matupi khuami duhnak zong si ve kho. Cuti si lo in hmunkhat ah tampi an sak dih ah cun buaibainak um khomi asi. Cozah lei nih an duh deuh mi hmun cu Phanang le Ngalang kar vawilei hmun hi asi. Uh-ing zung lei in lutlai pakhat zong nih kan hnu ah khan a rak zoh bal cang” tiah a chim.

Matupi peng dirhmun in pengkomh dirhmun ah 2017 kum chung ah fehter asi i atu ah pengkomh zung saknak ding vawilei hmun an zoh cang nain an fehter kho rih lo tiah kan theih.

Ref: Chin World

Na ruahning rak langhter ve.. (Leave a comment)

%d bloggers like this: