Media Pawl Ṭha Tein Ngiat le Dantat Ding Tiah SAC Hruaitu Nih A Fial Hna
The Chinland Post | 2023 September 4 — Media pawl ṭha tein ngiathlai ding le dantatnak cu ṭha deuh le ṭhawng deuh in kalpi ding in SAC hruaitu General Min Aung Hliang nih a luancia August 30, Naypyitaw ah an tuah mi Meeting ah a chim.
“Ram le miphun lungrualnak a hrawktu thil pawl an tlaunak hnga ca, ringawn, muicawl le social media lei hrap kha ṭha tein rengh ding” tiah SAC Ministers pawl cu SAC hruaitu Min Aung Hliang nih a fial hna.
Hramhram in uknak lak a si hnu ah SAC nih Media phu 10 leng cu License a hrawhpiak hna, thawngpang latu pawl a tlaih hna, ca chuahnak le ca phawtzamhnak cheukhat a kharpiak hna leng ah ca chuahnak phung zong a remh.
SAC nih amah a dohtu pawl kha a hrem hna i mei a mih ruang ah SAC hruaitu le SAC kuttang Electric zung rianngeitu pawl sual a phawtnak bia a chim mi hlasak thiam Byuha cu thong kum 20 thlak ding in bia an khiah.
SAC ruang ah Media pawl zalonnak a um ti lo i Reporter san frontier (RSF) nih 2023 May thla ah a thanh mi Media zalonnak a um lo bik nak ram 180 chung ah Myanmar ram cu a tang bik ram 10 chung ah aa tel.
Cun ringawn le muicawl hrap lei zong ah, lemcang cheukhat tlaih an tong i muicawl pawl zong SAC sin ah nawl hal i an awnh hnu lawng ah langhter ding in an thanh.
Hramhram in uknak lak a si hnu ah zalong tein chimphuannak nawl an rengh i online cung caṭial le biachimnak pawl zong an ngiat lengmang i SAC a dohtu le sual a phawtu pawl, NUG le PDF pawl cohlannak ca a ṭial mi poah cu an tlaih hna.
