Mei A Kangh Tikah Phone In Video Thlak A Hmangmi Hi Dawnkhantu An Si; U Kyaw Kyaw

0

Salai Cung Cung| 2019 March 21| Chin ramkulh ah inn 46 a kang i minung 3 an thi. Chin ramkulh mei a kangh tikah phone in video thlah a hmangtu le lamkam ah khat dihlak in cycle chiah a hmangtu hna hi bawmtu si lo in dawnkhantu ah an si tiah Chin ramkulh Meithat zung lutlai changtu nih a chim.

“Meithat zung lei in mei a kangh tikah harnak kan ton theumi cu ti a harmi ruang ah a si. Amah belte atu cu Timit ti a ngah cang caah kan tlamtling deuh ngai cang. Mei a kangh tikah mizapi nih rian bawmh lo in phone in video thlah a hmangmi an tamtukmi le lamkam ah cycle khat dihlak in chiah an hmanmi hi hnahnawk taktak an si. Kan caah bawmtu si lo in hnahnawhnak petu le dawnkhantu ceo men an si. Mizapi lei nih mei a kangh tikah anmah le ti khawh tawk te in an kan bawmh cio a herh” tiah  Chin ramkulh meithat zung in Deputy Director U Kyaw Kyaw nih The Chinland Post ah a chim.

“Mei a kangh tikah mizapi nih an kan bawmh ahcun rianrang deuh in mei kan phelh, kan hmih khawh lai. Mei hi a fate in aa thawk mi a si caah mah le inn cio ah mitatbu i chiah khawh ah cun mei a thawh cangka tein an thah khawh lai” tiah a biapeh ah a chimchap.

2018 January in 2019 March 21 tiang Chin ramkulh pengkip innkang cazin cu; Hakha peng ah inn 10 a kaang i minung 3 an thi. Thantlang peng ah inn 1, Falam peng ah inn 13, Tedim peng ah inn 7, Mindat peng ah inn 6, Paletwa ah inn 6, Kanpetlet ah inn 1, Matupi ah inn 2, a zapi inn 46 a kang. Hi inn 46 chung ahhin sianginn pakhat aa tel chih tiah kan theih.

Chin ramkulh pengkip meithat zung in meithat motor 15, mibawmhnak motor pa 2 le Mizaw phor motor pakhat an ngei tiah kan theih.

About The Author

Na ruahning rak langhter ve.. (Leave a comment)

%d bloggers like this: