Meithal kahnak in Paletwa peng ah Daw Hawi Khin, kum 76 a thi

Salai Tluangkipthang – Meeletwa le Paletwa karlak ah aho tiah theih hngalh lomi nih meithal kahnak in vokkuang lawng cung ah Daw Hawi Khin, kum 76 cu a thi tiah Chin Human Rights Organization (CHRO) sin in kan theih.

“Nihin zing suimilam 9 tluk ahkhan a si. Meeletwa khua in Paletwa khuapi lei ah a rak kir lio ah, meithal kahnak in Daw Hawi Khin hi a thih hi a si. Meithal hliamhma in a thih hi a si i, aho nih dah a kah timi bel chim awk ah a har ngai” tiah Paletwa i CHRO riantuantu nih a chim.

Paletwa khuami pakhat nih, Paletwa ah ralzam in a um cangmi hawikom minung 3 cu Meeletwa khua lei ah thilri, thing hlam i thing phorh le a dangdang tuktak va lak ah an kal. Zingka tein an kal i, khua chung zong cu an va phan ko cang. Meeletwa khua zong cu an va phan i, tihthing le tuktak he an rak kir i, Paletwa lei kap an rak phanh ahhin meithal kah an ton hi a si tiah a chim.

Daw Hawi Khin hi Kyilay khuakomh (ohsuh) i, Mintta khua mi a si tiah kan theih.

“An kalnak a ruang cu khuapi chung ah tihthing zong a hun har thluahmah cang i, cucu thing hlam ah an hei kalmi cu a si ko. A kaptu nih hin, an tlerhnak in an kahmi hna a si ahcun, an kal lei zong ah kah deuh ding, a silo ah khua chung an um lio zong ah kah deuh awk, a tu cu an kir i Paletwa lei kap va ral an phanh ah an kahmi hna a si tik ahhin zeidah an duhnak a si hnga timi fian a har ko Paletwa khuami pakhat nih cun a chim.

Meeletwa khua hi khuami nih an chuah taknak a sau cangmi a si. Kum thawkka February hrawng ahkhan an chuah tak cangmi a si. Cun, kan hnu May 27 zong ah aho tiah hngalhlo mi nih an khua cu mei an khangh piak cang hna. Cucu mei an khua mei an khangh lio zong ah Paletwa ah ralzam in a um cangmi khuami nih va hmih ding ah an kal hnawh nain Kawl Ralkap nih an rak kah hna ruang ah an khua an phan kho lo. Mei hmih khawhlo in an rak kir tiah CHRO sin in kan theih.#