Meithat pawl an umnak tlangbo ah hmunhma a khuarmi SAC ralkap pawl kah an tong

The Chinland Post | 2022 May 23 – Chin ramkulh, Mindat khua meithat pawl an umnak ah hmunhma a khuarmi SAC ralkap pawl cu May 22 zaan sml 10:00pm hrawngah CDF-Mindat nih an kah hna tiah theih a si.

Kahdohnak hi sml cheu hrawng a rau i SAC ralkap 2 an thi, CDF-Mindat lei nih hliamhma tuar lo tein hnu an kir kho tiah CDF-Mindat nih an thanh.

“SAC ralkap nih sianginn awn ṭhan an i tim. Sianginn an awn ṭhan a si ahcun a zual chin lai. Zeitin hmanh in kan cohlang kho lo. Cucaah, ralrin peknak caah kan kah hna hi a si” tiah CDF-Mindat biachimnak nawl ngeitu Salai Ha Om nih a chim.

Non-CDM saya/mah pawl kan tlai hna lo nain SAC nih a duhning in sianginn a awn ṭhan a si ahcun fak piin a zizutnak kan tuah lai tiah a chim.

Mindat khua chungah a ummi mino fim cawnnak caah cun NUG program le Mindat mipi uknak phu kuttang fim cawnnak program ah kai a si i pehzulh in tuah a si tiah a chim fawn.

May 23 zing ah SAC nih hriamngan kah thlorh in a kah ruangah kum 11 hngakchia pakhat a ke khatlei a bul, kum 40 nu pakhat zong a lu ah hma a pu i mipi inn 2 a rawk tiah a chim.

 

Na ruahning rak langhter ve.. (Leave a comment)

%d bloggers like this: